Elordalyq erekshe balalar taekvondo beldigin qorǵady
NUR-SULTAN. QazAqparat – Elordada alǵash ret erekshe kútimdi talap etetin balalar beıimdilgen taekvondodan aq, sary jáne qyzǵylt sary tús beldikterin qorǵady, dep habarlaıdy QazAqparat tilshisi.
«Búginde bizdiń ortalyqta 25 bala múgedek jandarǵa beıimdelgen taekvondomen aınalysady. Bul aldymen balalardyń densaýlyǵy úshin paıdaly. Sebebi bul jerde olardyń kóbisi DTsP jáne aýtızmmen aýyrady. Al sport olardyń densaýlyǵynyń jaqsarý balansyn saqtaýǵa oń áserin tıgizedi. Ár balanyń qabileti men deńgeıi ártúrli, sebebi ol dıganozǵa baılanysty. Degenmen erte jastan aınalysqany durysyraq. Árıne, alǵashqy ýaqytta qıynǵa túsedi, eń bastysy ıntellektisi joǵalmasa, bala alyp ketedi. Balalar aptasyna 2 ret 1 saǵattan jattyǵady», - dedi beıimdelgen taekvondo jattyqtyrýshysy Mıras Tólebaev.
Búgingi sharada barlyǵy 14 bala 3 túrli (aq, sary, qyzǵylt sary) tústi beldikke ıe boldy.
«Erekshe kútimdi qajet etetin balalardy beıimdelgen taekvondomen shuǵyldaný jobasy elimizde alǵash qolǵa alynyp otyr desek te bolady. Sebebi DTsP men aýtızmge shaldyqqan balalardyń densaýlyǵy erekshe kútimdi talap etedi. Aldaǵy ýaqytta sportpen aınalysatyn balalardyń sanyn artqanyn qalaımyn, sondaı-aq osyndaı erekshe balalarǵa arnalǵan sport akademııasyn ashqym keledi», - deıdi ol.
«Meniń jasym 8-de, 3-synypta oqımyn. Taekvondomen 3 jyl boıy aınalysyp kelemin. Osyǵan deıin taekvondodan jarysqa qatysyp, kýbok jeńip aldym. Biz trenermen aptasyna 4-5 ret jattyǵamyz. Maǵan taekvondomen aınalysqan unaıdy», - deıdi beıimdelgen taekvondodan qyzǵylt tús beldikti qorǵaǵan Nurmuhammed Elemes.
Nur-Sultandaǵy paralımpıadalyq jattyǵý ortalyǵyndaǵy sporttyq shara «Samruk-Kazyna-Trust» áleýmettik jobalardy damytý qorynyń uıytqy bolýymen ótti.
