Elordalyq energetıkter danııalyq áriptesterine JEO-2 jáne JEO-3-ti kórsetti
ASTANA. QazAqparat - Danııanyń Sankt-Peterbor qalasyndaǵy Bas konsýly Klaýs Serensen bastaǵan delegatsııa resmı saparmen Astanaǵa keldi.
Sapar baǵdarlamasynyń alǵashqy kúninde meımandar eki iri energetıkalyq nysanda - JEO-2 jáne JEO-3-te boldy. Bul týraly astana.kz saıtyna Astana qalasy ákimi apparatynyń baspasóz qyzmetinen habarlady.
«Astana Energııa» AQ Basqarma tóraǵasynyń birinshi orynbasary Oleg Ýtkın JEO-2 nysanyndaǵy jaǵdaıǵa toqtalyp, ony keńeıtý jáne qalpyna keltirý jumystary týraly aıtyp berdi. Resmı delegatsııa JEO-3 qurylys alańynda energetıkalyq nysannyń qurylysymen jáne Jobany iske asyrý josparlarymen tanysty.
Budan basqa, delegatsııa «Haıvıll Qazaqstan» JShS nysandarynda, naqtyraq aıtqanda, «Haıvıll Astana» aqyldy úıiniń qurylysynda boldy. Meımandar Basqarý ortalyǵy arqyly barlyq protsesterdi baqylaý, energııa tıimdi jáne resýrs únemdeý tehnologııalaryn paıdalaný, jylý aǵynyn avtomatty retteý júıesine basa nazar aýdardy.
Qala basshysynyń orynbasary Vasılıı Krylovtyń jetekshiligimen ótken dóńgelek ústel barysynda ortalyqtandyrylǵan jylýmen qamtýdyń ınnovatsııalyq tásilderi jáne energııa tıimdilikti arttyrý jónindegi is-sharalardy júzege asyrý máseleleri talqylandy.
Energetıka basqarmasynyń habarlaýynsha, jınalys qorytyndysy boıynsha qazaqstandyq Joǵary tehnologııalyq, energııa tıimdi jáne ınnovatsııalyq kompanııalar qaýymdastyǵy men Jylýmen qamtý jónindegi Danııa keńesiniń arasynda ózara túsinistik týraly memorandýmǵa qol qoıyldy.
