Elordalyq emhanalarda Smart Astana jobasy júzege asyrylýda
ASTANA. QazAqparat - Búgingi tańda Astanada Smart Astana jobasy júzege asyrylýda, bul shara qala ómirinde jańa tehnologııalardyń ekonomıkalyq jáne ekologııalyq negizde jumys isteýine jáne elordada ınnovatsııalyq platforma qurýǵa baǵyttalǵan, dep habarlaıdy elorda ákimdiginiń resmı saıty.
Smart Astana jobasynyń kontseptsııasy negizinde elorda turǵyndaryna medıtsınalyq kómek kórsetý sapasyn jaqsartý boıynsha úzdiksiz jumys atqarylýda. Aqparattyq júıeni engizý - medıtsınalyq mekemelerdiń halyqpen tyǵyz baılanys ornatýyna óz septigin tıgizedi. Atap aıtqanda, keıbir medıtsınalyq mekemelerde aqparattyq júıe engizý boıynsha jumystar júrgizildi, elektrondyq kezek, dáriger qabyldaýyna onlaın jazylý, elektrondyq medıtsınalyq karta sekildi jańashyldyqtar engizildi. Atalmysh ınnovatsııalyq júıe búginde № 10 qalalyq emhana bazasynda da jumys isteýde.
«Kezek kútýdi joıý, qolaıly jaǵdaı qurý, eresekter men balalar arasyndaǵy kezekti qadaǵalaý maqsatynda bul jańashyldyqtar engizilip otyr. Sondaı-aq, tirkeý jáne qabyldaý protsedýralary úshin Triage-júıesi engizildi, bul kelýshilerdiń aýrý jaǵdaıy men ótinishine qaramastan qabyldaýlar júrgizýge septigin tıgizedi. Munyń barlyǵy sanıtarlyq-epıdemıologııalyq jaǵdaıdy saqtaýda mańyzy zor jáne ár túrli ınfektsııalyq aýrýlar taraýynyń aldyn alady», - dep atap ótti Astana qalasy Densaýlyq saqtaý basqarmasynyń basshysy E. Baıjúnisov.
№ 10 qalalyq emhana bazasynda ambýlatorlyq hırýrgııa ortalyǵy jumys isteıdi. Ortalyq zamanaýı qural-jabdyqdarmen qamtylǵan, naýqastarǵa ambýlatorlyq deńgeıde (hırýrgııa, ýrologııa, gınekologııa) jedel kómek kórsete alady. Sondaı-aq, kosmetıkalyq hırýrgııany engizý josparlanyp otyr.
Sonymer qatar, kelesi jyly naýqastyń elektrondyq medıtsınalyq kartasy engizilmek.
Aıta ketý kerek, Smart Astana jobasy aıasynda Astana qalasy ákimdigi men Astana qalasynyń Densaýlyq saqtaý basqarmasynyń qoldaýynda 2014 jyldan beri Biryńǵaıaqparattyq medıtsınalyq «Call-ortalyǵy» elorda turǵyndary men qonaqtary úshin (1300 qysqa nomeri boıynsha) jumys isteıdi.
«Call-ortalyq» medıtsınalyq uıymdarda qyzmet kórsetý sapasyn arttyrýǵa, adamdardyń ótinish-tilekterimen jumys isteý tıimdiligin jaqsartýǵa baǵyttalǵan», - dedi E. Baıjúnisov.
