Elordalyq elimizdegi alǵashqy Zaǵıptar úıin salýǵa bekinip otyr

NUR-SULTAN. QazAqparat – Elordada «Mıras» qorynyń prezıdenti Júzbaı Serikuly Eńbek jáne halyqty áleýmettik qorǵaý mınıstri Birjan Nurymbetovtiń qabyldaýynda bolyp, oǵan Zaǵıptar úıiniń jobasyn tanystyrdy, dep habarlaıdy QazAqparat tilshisi.

Júzbaı Serikuly mınıstrmen kezdesý úshin búgin «Nur Otan» partııasynyń respýblıkalyq qoǵamdyq qabyldaýyna kelip, osyndaı másele kóterdi. Aıtýynsha, elimizdegi zaǵıp jandardyń muqtajdyǵy barshylyq.

«Meniń ózim І toptyń múgedegi bolǵannan keıin múgedek jandardyń jaǵdaıyna basa mán beremin. Qoǵamda ártúrli jaǵdaı bolyp jatyr. Máselen, kóz janarynan aıyrylǵan jandar kómekke óte muqtaj. Kózine ota jasalyp, jalǵyz qalǵan qanshama adamdy kórdim. Osyndaı qıyndyqtarǵa tózbeı óz-ózine qol jumsaı jazdaǵan adamdar da bar. Olardy sabyrǵa shaqyryp, «eger Alla násip etip, kózimde kishkene sańylaý ashylsa, Zaǵıptar úıin salýǵa áreket jasaımyn» dep ýáde berdim. Sol áreketimizdiń ońynan sheshilip turǵan jaıy bar. Maqsatymyz – jer alyp, ǵımarat salý. Búkil Qazaqstannyń jer-jerinde kóz janarynan aıyrylyp, jalǵyz qalǵan jandar sol jerde tursa deımin», - dedi Júzbaı Serikuly.

Qor dırektorynyń aıtýyna qaraǵanda, elimizde Qarttar úıi, Múgedekter jáne Balalar úıiniń bary belgili. Biraq, kóz janarynan aıyrylǵan adamdarǵa arnalǵan úı joq.

«Zaǵıp jandar qınalǵanda qaıda bararyn bilmeı qalady. Álbette, eshkimdi eshkimmen salystyrǵym kelmeıdi. Jobanyń qurylymyn jasap qoıdyq. Ol ǵımaratty salsaq, onyń ishinde óziniń basseıni, jattyǵý zaly, oftalmologııasy bolady. Ol jerde kásibı jumysymen de aınalysýǵa múmkindik qarastyrsaq deımiz», - dedi ol.

Júzbaı Serikulynyń esebinshe, Zaǵıptar úıin salýǵa shamamen 5 mln AQSh dollaryndaı qarajat kerek. Ǵımarat úshin qor basshysy 2 gektar aýmaqtyń qajettigin aıtady.

«Árıne, jumyla kótergen júk jeńil deıdi. Sol úshin búgin mınıstrdiń aldynda birigip ınvestorlar men demeýshilerdi tartý máselesin kóterdim. Sol jaǵynan qoldaý taýyp, oıymyz iske asyp ketse deımiz. 13 qarasha – Dúnıejúzilik zaǵıptar kúni. Sonyń qarsańynda elordadaǵy «Turan» meıramhanasynda «Qarańǵydaǵy keshki as» atty qaıyrymdylyq is-sharasyn ótkizeıik dep jatyrmyz. Sol keshke qaladaǵy beldi kásipkerlerdi, depýtattardy shaqyryp, atalmysh máseleni kótermekpiz. Onda múmkindigi shekteýli azamattar da bolady. Sol jerde jobamyzdy tanystyryp, kelýshilerge qarańǵyda keshki asyn ishkizbekpiz. Dárigerlerdiń ózi qarańǵyda tamaqtanýdyń densaýlyqqa paıdaly ekenin dáleldegen. Sonymen birge, qarańǵyda zaǵıp jandarmen birge ómirdiń qandaı bolatynyn sezinip kórse eken degen nıet te bar», - dedi ol.

Júzbaı Serikuly keltirgen málimetke sensek, Qazaqstanda qazirgi tańda 25 myń zaǵıp jan bar. Al Nur-Sultanda kóz janarynan aıyrylǵan І jáne ІІ toptaǵy 600 adam bar.