Elordalyq ekinshi synyp oqýshylary mýltfılm jasaıdy
«Biz oqý baǵdarlamasyn 2017 jyly jasap shyǵardyq. Bastama balalardyń logıkalyq oılaý qabiletin arttyryp, kreatıvtilikke, bolashaqqa ázirlikke baýlıdy. Olarǵa gadjetter men kompıýterlerdi oıynshyq retinde emes, jumys isteýge arnalǵan qural ekenin túsindire úıretkimiz keledi. Balalar baǵdarlama aıasynda anımatsııalar men mýltfılmderdi, ózderi qurastyrǵan oıyndardy jasap shyǵaratyn bolady. Olar ózderiniń shyǵarmashylyq áleýetterin osylaı pash ete alady», - deıdi «Zerde» holdıngi Tsıfrlyq daǵdyny damytý departamentiniń dırektory Laýra Jumanálıeva.
Onyń aıtýynsha, atalǵan bastama holdıngtiń arnaıy jobasy bolyp otyr.
«Biz baǵdarlamany barynsha keńeıtýdi kózdep otyrmyz. 2018-2019 jyldary jobaǵa ózge de oblystyń mektepteri atsalysady. Bul tek aprobatsııa bolatyn. Azdaǵan kemshilikterin baıqaǵan soń, baǵdarlamany qaıta ázirleıtin bolamyz. «Zerde» avtorlyq quqyq baǵdarlamasy degen arnaıy kýálik te aldyq», - deıdi ol.
Balalar mektepte ashyq sabaq barysynda ákimdiktiń qyzmetkerleri men BAQ ókilderi úshin ózderiniń kompıýter tilin meńgergen daǵdylaryn pash etti.
«Bul joba Memleket basshysynyń Joldaýy, «Tsıfrlyq Qazaqstan» men «Smart Astana» baǵdarlamalary aıasynda bastaldy. Tuńǵysh ret bıylǵy oqý jylynda joba bastaýysh synyptardyń oqýshylary úshin engizildi. Bul baǵdarlamanyń ereksheligi nede? Bul rette oqytý balalar úshin oınatý formasynda júrgiziledi. Bul - álemniń barlyq balalary oqytylyp jatqan skretch (baǵdarlamalaý tili) ádisimen júrgizilýde», - deıdi Astana qalasy ákiminiń orynbasary Málıka Bekturova.
