Elordalyq eki boıjetken sheteldik «kúıeý» jigitterge 19 mln teńge aýdarǵan
NUR-SULTAN. QazAqparat – Nur-Sultan qalasynyń polıtsııasyna eki aıdyń ishinde ınternet-alaıaqtyq faktileri boıynsha eki ótinish kelip túsken, dep habarlaıdy QazAqparat elordalyq polıtsııa departamentine silteme jasap.
Jábirlenýshilerdiń túsindirýinshe, olar Facebook, Mail.ru áleýmettik jelilerinde sheteldik azamattarmen tanysyp, birneshe aı boıy romantıkalyq hat jazysqan. Áıelderdiń senimine ábden kirip alǵan alaıaqtar bitimgerlik mıssııa jasaımyz degen syltaýmen aýdıo nemese beınebaılanysqa shyqpaı, tek tólqujat kóshirmesin jibergen.
Hat almasý kezinde ańǵal boıjetkender er adamdardyń Qazaqstanǵa kelip, olardy basqa elge alyp ketetine senip, «jigitterine» úlken somada aqsha jibergen.
«Turmysqa shyǵýdy usynǵan alaıaqtar boıjetkenderden memlekettik baj tóleý, tólqujatty jańartý, vızaǵa tapsyrys berý sııaqty máselelerdi sheshý úshin qajetti soma jiberýdi suraǵan. Er adamdardyń izgi nıetine sengen jábirlenýshiler halyqaralyq aqsha aýdarý qyzmeti arqyly suraǵan somalaryn jiberip otyrǵan. Aqshany qolǵa túsirgen kúdiktiler jeliden shyǵyp ketip, odan keıin baılanysqa shyqpaǵan. Shyǵyn somasy bir oqıǵada - 13 mln teńgeni, ekinshi oqıǵada – 6 mln teńgeni qurady», - dep habarlady baspasóz qyzmetinen.
Atalǵan faktiler negizinde QR Qylmystyq kodeksiniń 190-baby boıynsha qylmystyq is qozǵaldy. Oqıǵaǵa qatysy bar tulǵalardy anyqtaý boıynsha jedel-izdeý sharalary júrgizilýde.
