Elordalyq dızaıner ALJIR murajaıynyń jádigerlerine jan bitirdi

NUR-SULTAN. QazAqparat - Elordalyq moýshn-dızaıner Almaz Dúısebaev Instagram áleýmettik jelisinde óziniń kezekti týyndysy – «Aljır» murajaıynyń jádigerlerine jan bitirgen qysqa vıdeosyn bólisti.

Almaz Dúısebaev murajaı jádigerlerin smartfonyna vıdeoǵa túsirip, anımatsııa men arnaıy effektilerge arnalǵan grafıkalyq baǵdarlama arqyly pishinderdi qozǵalysqa keltirgen.

Kadrlarda tutqyn áıelderdiń lagerdegi ómiri kórsetilgen.

Bireý tigin mashınasymen jumys istep otyrsa, taǵy bireý salqyn kamerada nárestesin jylytyp álek, qalǵandary balalarynyń jazǵan hatyn oqyp otyr.

«Jaýsyz jandar júrgizgen kimge zańyn,

Baqyt jaıly men qalaı jyr jazamyn.

Aıtý qıyn jylamaı «Aljır» atty

Áıelderge arnalǵan túrme azabyn», - degen Qanıpa Buǵybaevanyń jyr joldary berilgen vıdeoda.

«ALJIR» memorıaldyq kesheni totalıtarızm kezindegi saıası qýǵyn-súrgin qurbandaryna estelik retinde Aqmola oblysynda turǵyzylǵan.

Bul jerde 1937-1939 jyldar aralyǵynda qýǵyn-súrginge ushyraǵan Keńes odaǵynyń shet-shetinen jınalǵan jazyqsyz 18 myń áıel men balalardyń esteligi jatyr.

Aıta ketý kerek, Almaz Dúısebaevtyń barlyq jobalaryn qoǵam jyly qabyldap, jaqsy pikir aıtqan.