Elordalyq Dınara Sádýaqasova áıelder arasynda halyqaralyq dárejedegi sport sheberi atandy

Aıta keteıik, buǵan deıin ol jastar arasynda shahmattan álem chempıony retinde tanylǵan. D. Sádýaqasova osy sportqa 4 jasynan bastap beıimdelgen edi. 7 jasynda 1-shi dárejeli shahmat­shy atanyp, 8 jasynda sport sheberligine úmitkerler qatarynda boldy. Keıin, 11 jasynda halyqaralyq dáre­jedegi sport sheberi, 13 jasynda halyqaralyq shahmat qaýym­dastyǵynyń sheberi ataqtaryn qanjyǵasyna baılady. Osy jyldary álemdik jáne otandyq jarystarda júldeli oryndardan tabylǵan D. Sádýaqasova - Grekııada ótken álem chempıo­na­tynda altyn alqanyń ıegeri atanǵan bolatyn.

Jaqynda Halyqaralyq shahmat federatsııasy onyń kásibı sheberligi men shahmattaǵy joǵary talabyn eskere otyryp, Polshada ótken kongreste D. Sádýaqasovany áıelder arasynda halyqaralyq dárejedegi sport sheberi qurmetine laıyq dep tapty.

Búginde jasy 15-ke endi ǵana tolǵan elordalyq jas shahmatshy Túrkııada ótip jatqan jasóspirimder olımpıadasyna qatysyp jatyr. Bul ataýly saıys 23 qazannan beri ótýde. Álem elderinen 27 komanda qatysyp jatqan Shahmat olımpıadasynda Qazaqstan namysyn Álibek Igembergenov (Oral), Janat Saıyn (Pavlodar), Ádilet Zaýrenbekov (Astana), Aıan Ahmetov (Astana) jáne Dınara Sadýaqasova (Astana) qorǵap jatyr. Jarys qorytyndysy búgin belgili bolady dep kútilýde.