Elordalyq depýtattar Altaı Kólginovke qalanyń basty problemalaryn atady
NUR-SULTAN. QazAqparat - Nur-Sultan qalasynyń ákimi Altaı Kólginov qalalyq máslıhat depýtattarymen kezdesti. Halyq qalaýlylary turǵyndardyń anaǵurlym ózekti máseleleri jáne qala ınfraqurylymyn damytýdyń júıeli problemalary jóninde aıtyp, olardy sheshý boıynsha usynystaryn jetkizdi, dep habarlaıdy QazAqparat.
Ákimniń aıtýynsha, qalanyń tynys-tirshiligin qamtamasyz etý nysandary boıynsha kóptegen suraqtar bar. Sondaı-aq úleskerler, qalamańyn abattandyrý máseleleri de óz sheshimin qajet etedi.
«Elbasy men el Prezıdenti elordany damytý jóninde aldymyzǵa úlken mindetter qoıdy. Qala turǵyndary bizge senim bildirý úshin olardy birlesip sheshýimiz qajet», - dedi ol.
Depýtattar jańa aýdandardy salý kezinde olardyń ınfraqurylymyn ázirleýge muqııat qaraý talap etiletinin, bul rette qurylysqa jaýapty barlyq mekemeniń ózara is-qımylynyń naqty tetigi bir jolǵa qoıylýy tıistigin atap ótti.
Sondaı-aq, olardyń pikirinshe, bıýdjetti josparlaý kezinde halyqtyń usynystary, qajettilikteri men múddeleri eskerilýi tıis.
Eń kóp suraq saıajaı alqaptary men qalamańyn abattandyrý boıynsha týyndady. Keıbir turǵyn alaptarda trotýarlar, balalar alańdary, joldar, jyly aıaldamalar, sý burý júıeleri joq.
Sonymen qatar, depýtattar halyqtyń áleýmettik osal toptaryn baspanamen qamtamasyz etý, kɵshelerdegi keptelisterdi joıý, turǵyn úılerdi salý kezinde energııa únemdeıtin tehnologııalardy qoldaný máselelerin qozǵady.
Ákim kóterilgen barlyq problema kezeń-kezeńimen sheshiletinin atap ótti.
