Elordalyq dárigerler tumaýǵa qarsy vaktsına jasaýǵa shaqyrady
ASTANA. QazAqparat - Jyl saıyn kún sýyǵanda tynys alý joldarynyń vırýsty ınfektsııalaryna shaldyqqan adamdardyń sany artady. Tumaýdan qorǵanýdyń eń tıimdi joly ekpe jasatý bolyp tabylady. Immýndaý úshin eń qolaıly kezeń - qazan-qarasha aılary.
Astana qalasynyń densaýlyq saqtaý basqarmasynyń habarlaýynsha, qazirgi zamanǵy vaktsınalar asa tıimdi, qaýipsiz jáne alty aıdan asqan balalar men eresekter arasynda tumaýdyń aldyn alýǵa baǵyttalǵan. Immýnıtetti kúsheıtýge 2 kúnnen 7-15 kúnge deıin ýaqyt qajet jáne ol 6 aıdan 12 aıǵa deıin saqtalady.
Vaktsınalaý tumaýǵa jatpaıtyn basqa vırýstyq ınfektsııaǵa qarsy qorǵaýdy qamtamasyz etpeıdi, biraq vaktsınatsııa aýrýdyń óte jeńil túrde ótýine sep bolady jáne onyń asqynýyna jol bermeıdi.
Tumaýǵa qarsy vaktsınalaý ekpeniń Ulttyq kúntizbesine jatpaıdy, ony aqyly ekpe jasaý pýnktterinde salǵyzýǵa bolady. Atap aıtqanda, № 1, 2, 3, 4, 5, 6, 7, 8, 9 jáne 10 qalalyq emhanalarda, sondaı-aq «Intertıch» ODA (Kenesary, 1), «Medlaın» MO (Kúmisbekov k-si, 8), «Medıker» MO (Qabanbaı batyr dańǵ., 17), «Oren Clinik» MO (Otyrar k-si, 8/2), «Farmakom» QFK JShS (Maılın k-si, 15), «Intertıch Astana Medıtsınalyq Assıstans» MO (Máskeý k-si, 38 A), «Medıkal Assıstans grýpp» JShS (Syǵanaq k-si, 21/1), «Arhımedes Qazaqstan» JShS (Saraıshyq k-si, 5).
Aıta keteıik, bıyl Astana qalasy ákimdiginiń qoldaýymen halyqtyń áleýmettik qorǵalmaǵan toptaryna ekpe jasaý úshin tumaýǵa qarsy «Grıppol» vaktsınasynyń 15055 danasy satyp alyndy. Ekpe Balalar úıiniń, náresteler úıiniń tárbıelenýshilerine, Múgedekter úıindegi tulǵalar men soǵys ardagerlerine, sondaı-aq, «táýekel topqa» jatatyn balalarǵa, ekinshi jáne úshinshi trımestrdegi júkti áıelderge salynady.
