Elordalyq dáriger paýerlıftıngiden Azııa chempıony atandy

ASTANA. QazAqparat – №3 kópbeıindi qalalyq aýrýhananyń endoskopıst dárigeri Olesıa Kalınkına Dýbaıda paýerlıftıngiden ótken Azııa chempıonatynda altyn júldege qol jetkizdi, dep habarlaıdy QazAqparat Astana ákimdiginiń resmı saıtyna silteme jasap.

Dáriger bul sport túrimen nebári tórt jyl buryn ǵana, ıaǵnı 33 jasynda aınalysa bastapty. Maqsaty – densaýlyǵyn jaqsartý ǵana bolǵan.

«Paýerlıftıngiden álem chempıony, respýblıkalyq chempıonattardyń júldegeri, bapker Aleksandr Mıroshnıkovpen tanystym. Ol meniń nátıjelerimdi kórip, ózimdi kásibı sportshy retinde synap kórýdi usyndy. Ótken jyldyń mamyr aıynda Almatyda ótken Qazaqstan chempıonatyna qatysyp, kúmis júldege ıe boldym, alǵashqy óner kórsetýde birden «sport sheberleriniń» normatıvin oryndaǵan ekenmin», - deıdi Olesıa Kalınkına.

Endi dáriger sporttyq mansabyn jalǵastyrýǵa nıetti. Mamyrda Úndistanda ótetin Azııa chempıonatyna barýdy josparlap otyr. Ol medıtsına salasyndaǵy mamandyǵyn da qatar alyp júr. №3 aýrýhanada 2021 jyldyń qańtarynan bastap endoskopıst bolyp jumys isteıdi. Jalpy, eńbek ótili – 11 jyl.

«Men úshin biliktilikti arttyrý óte mańyzdy, sondyqtan únemi bilimimdi jetildirýge tyrysamyn. Semınarlarǵa, konferentsııalarǵa qatysyp, onlaın kýrstardan ótemin», - deıdi ol.

Sonymen qatar, Olesıa Kalınkına – aıaýly ana, súıikti jar. Jubaıy da dáriger.

«Eger siz shyn mánisinde qalasańyz, sportqa, jumysqa, otbasyna, bárine de ýaqyt taba alasyz. Týystarym meni jaqsy qoldaıdy, kómektesedi. Kúıeýim alǵashynda jańa sporttyq hobbıime qarsy boldy, ol paýerlıftıng áıelderge qolaıly emes deıtin. Endi jetistikterimdi kórip, meni maqtan tutatynyn jáne barlyq jaǵynan qoldaıtynyn aıtady. Ol meniń damyp, óskenimdi qalaıdy», - dedi jeńimpaz.

Foto: gov.kz