Elordalyq dámhanalar karantınde qalaı jumys istep jatyr
NUR-SULTAN. QazAqparat - 20 sáýirden bastap Nur-Sultan jáne Almaty qalalarynda karantın jeńildep, birqatar kásipkerlik sýbektileriniń jumysy jandanǵan edi. Qoǵamdyq tamaqtaný nysandarynyń da jetkizý qyzmeti saǵat 22:00-ge deıin uzartyldy.
Osy oraıda elordalyq «Buter Bro» JShS dırektory Murat Sapabekov QazAqparat tilshisine karantınniń bızneske qalaı yqpal etkenin aıtyp berdi.
«Bizdiń kompanııa 2015 jyly qalanyń oń jaǵalaýynda ashylǵan edi. Strıt-fýd baǵytynda aıtarlyqtaı tanymal orynǵa aınaldyq dep aıta alamyn. Bıyl elordanyń sol jaǵalaýynan taǵy bir fılıalymyz ashyldy. Ashylǵany sol-aq edi, pandemııa bastalyp, elimizde tótenshe jaǵdaı rejımi engizildi. Bul rejım biz sekildi talaı shaǵyn jáne orta bızneske áserin tıgizdi», - deıdi M. Sapabekov.
Onyń aıtýynsha, kompanııa taǵamdary jetkizý qyzmeti arqyly ǵana qoljetimdi. Turǵyndardyń ózi kelip, alyp ketýine tyıym salynǵan.
«Osyǵan baılanysty, qosymsha kýrerler jaldap, Wolt qosymshasymen jumys isteı bastadyq. Jetkizýde barlyq sanıtarlyq normalar saqtalady. ıAǵnı, kýrerlerimiz qorǵanys quralymen, medıtsınalyq maska, qolǵappen qamtamasyz etilgen. Bir tapsyrysty jetkizgen soń, mindetti túrde qolyn sanıtaızermen óńdep, qolǵaby men maskasyn, bir rettik qorǵanys kıimin aýystyrady jáne kelesi tapsyrysty jetkizge attanady», - dep túsindirdi kompanııa ókili.
Tapsyrysy jetkizýde de klıenttermen 2-3 metr ara qashyqtyq saqtalady.
«Karantınniń bizge paıdaly tustary da boldy. Máselen, eki jyl boıy keıinge qaldyryp kelgen ınternet-saıtymyzdy bir túnde jasap shyǵardyq. Qazir osy saıt pen mobıldi qosymsha, áleýmettik jelidegi resmı paraqshalarymyz arqyly tapsyrys qabyldaımyz. Munda klıent kýrerdiń ózine jaqyndamaýyn, tapsyrysty qaldyryp, 2-3 metrge alshaqtaýyn talap ete alady. Munyń bári - qaýipsizdik maqsatynda qolǵa alynǵan sharalar. Tapsyrys aqysyn da klıent onlaın karta arqyly qashyqtan jiberedi», - deıdi M. Sapabekov.
Dámhana qyzmetkerleri de jumys ornynda barlyq gıgıenalyq talapty ustanady.
«Kúndelikti saǵat 11:00-de jumysqa kelip, sanıtaızermen qolymyzdy, ústelderdi súrtip shyǵamyz. Ár eki saǵat saıyn kvarts lampasyn 20 mınýtqa qosyp qaldyramyz. Edendi de ylǵal shúberekpen birneshe ret súrtý zańdylyqqa aınaldy. Árıne, TJ saldarynan burynǵydaı tutynýshylar legi baıqalmaıdy. Degenmen, bir orynda toqtap qalmaı, tapsyrystar arqyly jumys istep jatyrmyz. Karatınnen erterek shyǵyp, súıikti kelýshilerimizben tezirek qaýyshqymyz keledi», - dedi M. Sapabekov.
Eske sala keteıik, QR Prezıdenti janyndaǵy Tótenshe jaǵdaı rejımin qamtamasyz etý memlekettik komıssııasy búginnen bastap Nur-Sultan jáne Almaty qalalarynda jumysyn bastaıtyn kásipkerlik sýbektilerdiń tizimin bekitti.
Tizimde ónerkásiptik kásiporyndar, qurylys jáne jol-qurylys salalarynyń kompanııalary, iri qurylys dúkenderi, kólik, qoıma kompanııalary, aýyl sharýashylyǵy maqsatyndaǵy servıstik kompanııalar, avtosalondar, TQS, avto jýý, dóńgelek aýystyrý servısi, avtobólshekter dúkenderi, hımııalyq tazalaý, keńse tehnıkasyn jóndeý jáne ekinshi deńgeıli bankter bar.
