Elordalyq D. Grýzdev Taılandta ótip jatqan Azııa chempıonatynyń kúmis júldesin jeńip aldy
ASTANA. 18 aqpan. QazAqparat - Astanalyq velosportshy Dmıtrıı Grýzdev Taılandta ótip jatqan Azııa chempıonatynda 40 shaqyrymdyq jekeleı synda kúmis medaldi jeńip aldy, dep habarlaıdy elordanyń Týrızm, dene shynyqtyrý jáne sport basqarmasy.
Altyn júldeni Qytaıdyń Gýanchjoý qalasynda ótken jazǵy Azııa oıyndarynda kúmis medalǵa ıe bolǵan qyrǵyz sportshysy Evgenıı Vakker oljalady. Ol Azııa chempıonatynda osymen 3-shi jeńisine qol jetkizip otyr. E.Vakker qashyqtyqty 56 mınýt 51 sekýnd ishinde júrip ótti. Bizdiń D. Grýzdev márege jeńimpazdan 1 mınýt 13 sekýnd ýaqytpen qalyp keldi. 3-oryn Gýanchjoýda qola medaldi mise tutqan tájirıbeli ırandyq Hýsseın Asqarıǵa buıyrdy.
Qatysýshylardyń sózinshe, bul jarys olarǵa ońaıǵa soqqan joq. 40 gradýs ystyqta 40 shaqyrymdyq jekeleı syndy baǵyndyrý - úlken syn. Óz qarsylasynan bir mınýttan astam ýaqytqa qalyp kelgen D. Grýzdev, daıyndyqqa ýaqyt jetpeı qalǵandyǵymen túsindirdi.
Erteń, 19 aqpanda bizdiń velosportshylar 160 shaqyrymdyq toptyq jarysta baqtaryn synaıdy. Qazaqstan quramasynda D.Grýzdevten bólek, Ivan Sıvash, Mıhaıl Kochetkov (Astana), Abylaı Shuǵaıypov (Pavlodar) syndy sańlaqtar bar.
Jattyqtyrýshy Aleksandr Kochetkovtyń aıtýynsha, atalǵan jarysta olardyń jeńiske jetýge úlken múmkindikteri bar. Sonymen qatar, onyń aıtýynsha, toptyq jarysta eki olımpıadalyq lıtsenzııa sarapqa salynady.
