Elordalyq tsırkke Qyzyl kitapqa engizilgen gepardtar attraktsıony keledi
ASTANA. 3 qyrkúıek. QazAqparat - Astanada 14-29 qyrkúıekte alǵash ret «Ostrov grez» biregeı tsırk shoýynyń gastrolderi ótedi. Bul týraly astana.kz saıtyna Úlken Máskeý tsırkiniń baspasóz qyzmetinen habarlady.
Astanaǵa 40 ártis pen qyzmet kórsetý personaly, 2 júk kólik toly janýarlar, Qyzyl kitapqa engizilgen gepardtar, qondyrǵylar tıelgen 6 júk kóligi, sabyn kópirshikteri men tútin shyǵaratyn mashına, lazerlik shoý jáne sýburqaqtar ákelinedi. Sıýjettik jelisi biregeı joba mıýzıkl, kıno, tsırk pen bı elementterinen turady.
«Kórermender basty keıipkerlermen birge venetsııalyq maskaradqa jáne brazılııalyq karnavalǵa qatysady, Mysyr freskalaryn tamashalap, Monmartr jeleginde serýendeıdi, balerına-kengýrýmen Úlken teatr sahnasynda bıleıdi jáne soltústik shuǵylanyń kýágeri bolady. «Ostrov Grez» - gepardtar qatysatyn álemdegi jalǵyz attraktsıon, dúnıe júzindegi jalǵyz manej-transformer. Budan basqa, manejde totyqustar, kengýrýlar, ıtter, ıllıýzııalyq shoý, kásibı balet kópshilik nazaryna usynylady; áýe sharymen ushý, jáne t.b.», - delingen aqparatta.
«Ostrov Grez» - biregeı tsırk qoılymynda aıyryqsha nomerler kórsetiledi. Shoý barysynda jańa tehnıkalyq jobalar, kompıýterlik grafıka, 20 metrlik sýburqaqtar men lazerlik arnaıy effektiler qoldanylady. Tsırk kórermeniniń jasyn arttyrýǵa, jastardy ónerge baýlýǵa baǵyttalǵan.
Eske salaıyq, Vernadskıı dańǵylyndaǵy Úlken Máskeý tsırkiniń bazasynda eń qyzyqty qoıylymdardyń biriniń kóshpeli nusqasy jasaldy. «Ostrov Grez» baǵdarlamasynda kórermender birden úsh manejdi tamashalaıdy. Atap aıtqanda, kilem, muz aıdyny jáne sý. Jobanyń kórkem jetekshisi Reseı tsırkiniń Prımasy Darıa Kostıýk. Jetekshi ártisi de, qoıýshysy ózi. Shoý elorda turǵyndary men qonaqtaryna 14 qoıylym usynady. Tsırk juma kúnderi saǵat 19:00 jáne senbi, jeksenbi kúnderi saǵat 13:00 jáne 17:00 bastalady.
