Elordalyq búldirshinder 99% balabaqshamen qamtylǵan
NUR-SULTAN. QazAqparat – Búginde Nur-Sultan qalasynda 400-den astam mektepke deıingi bilim berý uıymy jumys isteıdi. Jáne astanalyq balalardyń 99%-y balabaqshamen qamtamasyz etilgen. Bul týraly qalalyq Bilim basqarmasynyń basshysy Shákárim Seısenbaı málim etti, dep habarlaıdy QazAqparat tilshisi.
«Búgingi kúni elordada 52 307 balaǵa arnalǵan túrli tıptegi 419 mektepke deıingi uıym jumys isteıdi. Onyń ishinde 100 memlekettik jáne 272 (onyń ishinde 262-de memlekettik bilim berý tapsyrysy boıynsha) jeke menshik balabaqsha bar. Sonymen qatar 44 shaǵyn ortalyq jumys istep tur, onyń 2-ýi jeke menshik jáne 3-ýi vedomstvolyq uıym. Ótken jylmen salystyrǵanda bıyl elordada balabaqsha sany 42-ge ulǵaıdy», - dedi Sh. Sensenbaı qalalyq Máslıhattyń jalpy otyrysynda jasaǵan baıandamasynda.
Onyń málimetinshe, búgingi tańda elordada balalardy balabaqshamen qamtý 99%-dy quraıdy.
«2019 jyldan bastap memlekettik tapsyrys aıasynda jekemenshik balabaqshalar kóptep ashyla bastady, sonyń nátıjesinde mektepke deıingi bilim berý mekemeler sany 131-ge deıin artty. Al 2020 jyly 60-qa jýyq jańa jekemenshik balabaqshaǵa 5 800 orynǵa memlekettik tapsyrys ornalastyrylyp, 3-6 jas aralyǵyndaǵy balalardy balabaqshamen qamtý kórsetkishi 99% - ǵa jetti», - deıdi ol.
Qalalyq Bilim basqarmasynyń málimetine súıensek, qazirgi ýaqytta «INDIGO» elektrondyq júıesi arqyly balabaqsha kezegine 62 405 bala (0-6 jas) tirkelgen.
Buǵan deıin habarlaǵanymyzdaı, atalǵan jıynda qaladaǵy balabaqshalar arasynda reıtıng jasaý ıdeıasy kóterildi.
Sondaı-aq, Sh. Seısenbaı Nur-Sultan qalasyndaǵy balabaqshalardyń 100%-y beıne baqylaý kameralarymen qamtylǵanyn málim etti.
