Elordalyq boıjetken ata-anasyna ózin urlady degen jalǵan sms-hat jibergen
ASTANA. Qańtardyń 15-i. QazAqparat /Marlan Jıembaı/ - Qańtardyń 11-inde Astana qalalyq ІІD Uıymdasqan qylmysqa qarsy kúres basqarmasyna 1949 jyly týylǵan Aqmola oblysynyń turǵyny belgisiz bireýlerdiń elordada qyzmet atqaratyn 1983 jyly týylǵan qyzyn urlap ketkendigi jaıynda shaǵym túsirgen.
Sonymen qatar shaǵymdanýshy qyzyn urlaǵan belgisiz azamattyń ses kórsetip, telefon arqyly sms-hattar jibergendigin aıtqan.
«Jedel izdestirý is-sharalary barysynda polıtsııa qyzmetkerleri «VVS» qonaq úıi kesheninen 1969 jyly týylǵan Aqmola oblysy Qorǵaljyn aýdanynyń turǵynyn qolǵa túsirdi. Oqıǵa jelisin tekserý barysynda qorqytý mátinderimen jazylǵan sms-hattardyń bárin jábirlenýshi qyzdyń ózi jazǵandyǵy anyqtalyp otyr. Al urlyqqa qatysy bar degen azamat bul jaıttardan beıhabar bolyp shyqty. Qazir bul fakt boıynsha tergeý jumystary júrgizilýde», deıdi atalǵan vedomstvonyń memlekettik til jáne aqparat bastyǵy Nurdildá Oraz.
