Elordalyq boks mektebiniń úsh sportshysy Álem chempıonatynda Qazaqstannyń namysyn qorǵaıdy
ASTANA. 25 qyrkúıek. QazAqparat - 14-26 qazan kúnderi Almatyda bokstan Álem chempıonaty ótedi. Onda elordalyq boks mektebiniń úsh sportshysy Qazaqstannyń namysyn qorǵaıtyn bolady. Bul týraly astana.kz saıtyna qalalyq Týrızm, dene shynyqtyrý jáne sport basqarmasynan habarlady.
Іlıas Súleımenov (52 kg deıin), Mereı Aqshalov (64 kg deıin) jáne ulttyq qurama kapıtany Danııar Eleýsinov (69 kg deıingi «qazaq» salmaǵy) on bylǵary qolǵap sheberiniń ishinde álem chempıony ataǵyn sarapqa salady.
«Úsheýi de Qazaqstan chempıondary jáne Azııada ózderiniń salmaq sanatynda kósh bastap tur. Іlıas Súleımenov - Azııa chempıonatynyń kúmis júldegeri, «A» synybyndaǵy kóptegen halyqaralyq týrnırlerdiń jeńimpazy, Mereı Aqshalov - Azııa chempıony, áskerı qyzmetshiler arasyndaǵy álem chempıony, «Astana Arlans» klýbynyń sapynda jetken jetistikterimen belgili jáne Danııar Eleýsinov - Azııa chempıony, Azııa oıyndary jáne kóptegen halyqaralyq týrnırlerdiń jeńimpazy», - delingen aqparatta.
Álemdik deńgeıdegi sporttyq shara Qazaqstanda alǵash ret ótkizilip otyr, qazirgi ýaqytta 118-den astam memleket qatysýǵa nıet bildirdi. Bokstan Qazaqstan quramasy kez kelgen halyqaralyq dodada favorıt saanalady, bul joly da álem birinshiligin elimizde ótkizip, komandalyq esepte birinshi oryn alýdy maqsat etýde.
«Biz úshin bul - mańyzdy jarys. Komanda jyl basynan beri álem chempıonatyna tyńǵylyqty daıyndalýda. Árıne, alǵa qoıǵan mindetimiz bar. Biz kúresýge daıynbyz», - dedi D. Eleýsinov.
Eske salaıyq, ulttyq komanda álem chempıonatyna daıyndyq aıasynda oqý-jattyǵý jıyndaryn Myrzaǵalı Aıtjanovtyń basshylyǵymen Astanada Boksty damytý ortalyǵynda ótkizdi. Sońǵy jıyn 28 qyrkúıekte Almaty mańyndaǵy olımpıadalyq bazada Kýba, Irlandııa jáne Ázerbaıjan komandalarymen birge ótedi. Qazaqstannyń ulttyq quramasynyń sapynda on salmaq sanatynda Birjan Jaqypov (49 kg), Іlıas Súleımenov (52 kg), Qaırat Eralıev (56 kg), Berik Abdrahmanov (60 kg), Mereı Aqshalov (64 kg), Danııar Eleýsinov (69 kg), Jánibek Álimhanuly (75 kg), Ádilbek Nııazymbetov (81kg), Anton Pınchýk (91 kg) jáne Ivan Dychko (+91 kg) óner kórsetedi.
