Elordalyq Bilim basqarmasyna jańa qyzmet qosyldy
ASTANA. QazAqparat - Máslıhat depýtattary Astana qalasy ákiminiń Balalardyń quqyqtaryn qorǵaý basqarmasyn ákimdiktiń qurylymynan shyǵarý týraly sheshimin biraýyzdan qoldady. Basqarmanyń qyzmetteri Bilim basqarmasyna tapsyrylady, dep jazady elorda ákimdiginiń resmı saıtynda.
Bul týraly búgin Astana qalasy máslıhatynyń kezekten tys otyzynshy sessııasynda málim boldy.
«Ústimizdegi jyly 26 qańtarda 2013 jylǵy 17 maýsymdaǵy Astana qalasy ákimdiginiń «QR jergilikti memlekettik basqarýdyń bazalyq qurylymyn bekitý týraly» Qaýlysyna ózgerister engizildi. Osyǵan baılanysty, Astana qalasynyń ákimi 2014 jylǵy 17 aqpanda «2013 jylǵy 25 sáýirdegi Astana qalasy ákiminiń «QR astanasy Astana qalasyn basqarý shemasy týraly» sheshimine kelesideı ózgertý engizý týraly sheshim qabyldady. Oǵan sáıkes «Astanany basqarý shemalary bazalyq qurylymǵa sáıkestendirilip, ákimdiktiń qurylymynan Balalardyń quqyqtaryn qorǵaý basqarmasy shyǵarylady, onyń qyzmetteri Bilim basqarmasyna tapsyrylady», - dedi Astana qalasy ákimi apparatynyń memlekettik-quqyqtyq bóliminiń basshysy Dáýlet Dosqulov.
Eske salaıyq, Balalardyń quqyqtaryn qorǵaý basqarmasy Astana qalasynyń terrıtorııasynda jasy kámeletke tolmaǵandardyń zańdy múddeleri jáne quqyqtaryn qorǵaý salasyna jetekshilik etken Qazaqstan Respýblıkasynyń memlekettik organy bolǵan.
