Elordalyq baıkerler jol qozǵalysy erejesin saqtaýǵa shaqyrady
ASTANA. 21 tamyz. QazAqparat - Astanada kásipqoı avtoshabandozdar men baıkerlerdiń qatysýymen «Biz joldaǵy qaýipsizdikti qoldaımyz!» avtosherýi ótti. Bul týraly astana.kz saıtyna elordalyq Jol polıtsııasy basqarmasynan habarlady.
Avtosherý qalanyń eski bóliginde bastalyp, sol jaǵalaýda «Báıterek» monýmentiniń janynda aıaqtaldy. Baıkerler, avtoshabandozdar men men qalanyń avtomektepteriniń kólikteriniń sherýi barysynda jol polıtsııasy qyzmetkerleri patrýl kólikterinde dybys kúsheıtkish quraldardyń kómegimen úgit-nasıhat jumystaryn júrgizdi. Sonymen qatar, eriktiler elordanyń saýda jáne oıyn-saýyq ortalyqtarynda «Qymbatty joldas júrgizýshi!» flesh-mobyn uıymdastyrdy, júrgizýshilerge qaýipsizdik sharalary jaıynda jazylǵan jadynamalar men JQE saqtaýǵa shaqyrǵan balalardyń shyǵarmalaryn taratty. Shara sońynda baıkerler men avtoshabandozdar «Báıterek» monýmentiniń janynda ekstremaldy shoý kórsetti.
Eske salaıyq, 2013 jylǵy 7 aıda elordada 339 jol-kólik oqıǵasy oryn alǵan. Sonyń ishinde 80 apat barysynda 2 bala kóz jumyp, 80-i jaraqat aldy. Júrgizýshiniń kinásinen 250 JKO bolyp, 29 adam kóz jumsa, 270-i zardap shekti. Atalǵan is-shara arqyly jol polıtsııasy qyzmetkerleri balalar arasyndaǵy jol-kólik jaraqattarynyń jáne jalpy jol apattarynyń artýyna qoǵam nazaryn aýdaryp otyr.
