Elordalyq basqarma koronavırýs juqtyrǵandardyń jaǵdaıy týraly aıtty
NUR-SULTAN. QazAqparat – Nur-Sultan qalasynyń qoǵamdyq densaýlyq saqtaý basqarmasynyń basshysy Sáýle Qısyqova elordada koronavırýs juqtyrǵandardyń jaǵdaıy týraly aıtty, dep habarlaıdy QazAqparat tilshisi.
«Osy ýaqytta elorda boıynsha 25 adamda koronavırýs anyqtaldy. 18 adam ınfektsııalyq statsıonarda jatyr. Dene temperatýralary qalypty shamada. Shaǵymdary joq. Barlyq naýqas dárigerlerdiń qatań qadaǵalaýynda. Búkil medıtsınalyq kómek kórsetilip jatyr», - dedi ol tikeleı efırde ótken baspasóz máslıhatynda.
Basqarma basshysy 17 naýryzda jańa 15 jaǵdaı tirkelgenin aıtty.
«Jalpy juqtyrǵandardyń 74 paıyzy nemese 14-iniń jasy– 30-49 jas aralyǵynda. Eki jaǵdaıda jas aralyǵy 50-59. Bir jaǵdaıda 18-20 jas aralyǵy. Taǵy biriniń jasy 14-te. Osylardyń beseýi qalalyq statsıonarynda bolǵan. Tórteýi Italııa jáne Ońtústik Koreıa elderiniń reısterimen kelgen. Qazirgi ýaqytta olardyń jaǵdaıy jaqsy. Bir patsıent ınfektsııalyq blokta ótkir JRVI-diń aýyrlyǵy ortasha deńgeıde jatqan. Dıagnostıka barysynda odan da koronavırýs anyqtaldy. Qazir jaǵdaıy qanaǵattanarlyq», - dedi ol.
Sáýle Qısyqova qalǵan 11 adam monıtorıng barysynda anyqtalǵanyn jetkizdi. Keıbiri epıdemıologııalyq jaǵdaıy turaqsyz elderden kelse, keıbiri buryn juqtyrǵandarmen baılanysta bolǵan. Olardyń da jaǵdaıy jaqsy.
