Elordalyq balet trýppasy Lıtvanyń Kaýnas qalasynda kórermenderdi tánti etti

«Astana Opera» balet trýppasy lıtvalyq kórermenge álemdik klassıka jaýharlary men HH-HHІ ǵasyrdaǵy ataqty horeograftardyń týyndylary engen biregeı Gala-balet baǵdarlamasyn usyndy. Áıgili Kaýnas bekinisiniń janyndaǵy ashyq alańǵa jınalǵan myńdaǵan týrıst pen qala jurtshylyǵy qoıylymdy tamashalaǵan soń dý qol shapalaq soǵyp, «Bravo» dep ún qatyp, ózderiniń rızashylyǵy men shattyǵyn bildirdi.

Avtory «Astana Opera» balet trýppasynyń kórkemdik jetekshisi, Reseıdiń Halyq ártisi Altynaı Asylmuratova bolyp tabylatyn eki bólimnen quralǵan aýqymdy baǵdarlama A.Adannyń «Jızel» baletinen pa-de-demen ashyldy. Jas solıst Anastasııa Zaklınskaıa men onyń seriktesi - jetekshi solıst Oljas Tarlanov názik Jızel men graf Alberttyń beınelerin usyndy. Ártis qyz qalyqtaǵan jeńil orman perisiniń partııasyn sheber oryndap, áserli mahabbat oqıǵasyn bıdiń mánerli tilimen jetkize aldy. HІV ǵasyrdyń ortasynda Neman men Nerıs ózenderiniń qosylǵan tusynda salynǵan Lıtvanyń kóne tas bekinisi ǵajaıyp balettiń kórkem dekoratsııasynyń rólin atqardy. Al kontserttiń ekinshi bóliminde Anastasııa Zaklınskaıa N.Rımskıı-Korsakovtyń mýzykasyna M.Fokınniń horeografııasyndaǵy «Sheherazada» baletinen shyǵys arýy Zobeıdanyń keıpine sheber ene ketti. Altyn Qul rólinde balet solısi Serik Naqyspekov óner kórsetti.

Názik Jızelden keıin sahna tórine qushtarlyqqa toly syǵan qyzy Karmen shyqty. Lıtvalyq kórermen nazaryna J.Bızeniń mýzykasyna qoıylǵan HH ǵasyrdyń aıtýly horeografy Rolan Petıdiń attas baletinen dýet usynyldy. Qazaqstannyń eńbek sińirgen qaıratkerleri Gaýhar Ýsına men Rústem Seıitbekovtyń mánerli akterlik oıyny men sezimtal plastıkasy jınalǵan qaýymnyń eshqaısysyn beı-jaı qaldyrmady.

Shveıtsarııalyq baletmeıster Ksenııa Zverevanyń qoıylymyndaǵy qazaqstandyq kompozıtor Aqbota Raıymqulovanyń «Zaman tynysy» baletinen dýet - qııal men búgingi shyndyq ushtasatyn kóne sıqyrǵa toly qyzyqty áńgime bolyp tabylady. Ǵajaıyp oqıǵalarǵa tap bolatyn ári tylsym kúshke ıe qaharmandardy Qazaqstannyń eńbek sińirgen qaıratkeri Ánel Rústemova men Oljas Tarlanov somdady. Zamanaýı otandyq ári sheteldik avtorlar shyǵarmalarynyń úlgilerine A.Sadyqovanyń horeografııasyndaǵy Q.Shildebaevtyń «Tamyr» jáne Dj.Ýılıamstyń mýzykasyna K.Zverevanyń «Joǵalǵan jumaq» nómirleri endi.

Aınalada merekelik kóńil-kúı sezilip turdy, L.Mınkýstyń «Baıaderka» baletinen Úndi bıin, «Don Kıhot» baletinen Syǵan bıin (E.Sherstnevanyń redaktsııasy), A.Adannyń «Korsar» baletinen pa-de-de, R.Drıgonyń «Arlekınada» baletinen pa-de-deni oryndap, Kaýnas turǵyndaryn qýantqan ártister bar ónerin ortaǵa saldy. Jetekshi solıst Erkin Rahmatýllaev, solıster Daler Zaparov, Shuǵyla Ádephan, balet ártisteri Jánibek Imanqulov, Natalıa Kondıa, Nazıra Zaetova, Sultanbek Ǵumar, Ǵalymjan Nurmuhamet, Bostan Qojabekov, Danııar Jumataev jáne t.b. óz sheberlikterin kórermenge pash etti.

«Astana Opera» balet trýppasynyń etýalderi, Qazaqstannyń eńbek sińirgen qaıratkerleri Áıgerim Beketaeva men Baqtııar Adamjannyń óner kórsetýi jurtshylyqtyń erekshe shattyǵyn týdyrdy. Prıma men premer HH ǵasyrdaǵy M.Jarrdyń mýzykasyna R.Petıdiń «Parıj Qudaı anasynyń sobory» tanymal baletinen dýet oryndady. Áıgerim Beketaeva somdaǵan Esmeraldanyń minsiz ásemdigi, adaldyǵy, náziktigi men erkeligi júrekterdiń qylyn shertti, balerına jarqyn ártistik temperamentin, kásibı qabileti men tehnıkalyq daıyndyǵynyń joǵary deńgeıin kórsetip, osynaý kúrdeli partııada juldyzdaı jarqyrady.

Dene bitimi suryqsyz bolsa da, jany taza jarymjan qońyraýshy Kvazımodonyń asa kúrdeli plastıkasyn halyqaralyq sarapshylar men synshylar minsiz dep tanyǵan Baqtııar Adamjannyń ınterpretatsııasy kórermender tarapynan zor tabysqa keneldi. Jetekshi solıst bıiniń kúsh-qýaty, samǵap sekirýleri, minsiz tehnıkasy men ozyq akterlik sheberligi álemniń kóptegen elderiniń baletqumar jandarynyń júregin jaýlaı aldy. Kaýnas ta qalys qalmady - qazaqstandyq ártisterdiń darynyn súısine tamashalaýshylardyń qatary horeografııalyq ónerdi baǵalaýshy lıtvalyqtarmen tolyqty. Álemdik balet juldyzdary Á.Beketaeva men B.Adamjannyń oryndaýyndaǵy L.Mınkýstyń «Don Kıhot» baletinen Gran-pa keshtiń sońyn ǵajaıyp túıindedi.

Kórermenderdiń baǵalaýynsha, qazaqstandyq balet trýppasynyń óner kórsetýi klassıkalyq ónerdiń naǵyz merekesine aınalyp, Kaýnas turǵyndary men qonaqtary úshin tamasha syı boldy.

- Ártister bizge bıdiń joǵary mádenıetin, tehnıkalyq ári akterlik sheberligin kórsetti. Bıshilerdiń kásibı múmkindikteri kez-kelgen maqtaýdan joǵary. Olardyń árqaısysynyń ózindik ereksheligi, ártistik daryndylyǵy men jeke dara stıli bar ekeni aıqyn. Balerınalardyń qoldary men aıaqtarynyń syzyqtary minsiz, olar quddy bir qozǵalystaǵy poezııadaı kórindi. Trýppa, sózsiz, keremet kúıde. Sondaı-aq janrlyq san alýandyq pen qyzyqty da mazmundy nómirlerdiń kereǵarlyǵyn, kontserttik baǵdarlamanyń jaqsy oılastyrylǵanyn atap ótkim keledi. Barlyǵy unady: klassıkalyq baletter de, zamanaýı nómirler de, shyn máninde bári de keremet boldy! Kaýnastaǵy búgingi óner kórsetý sońǵy emes shyǵar degen oıdamyn, - dep áserimen bólisti Agne Raýde esimdi kórermen.

«Astana Opera» balet trýppasynyń Kaýnastaǵy gastroli «Rýhanı jańǵyrý» baǵdarlamasy aıasynda QR Mádenıet jáne sport mınıstrliginiń qoldaýymen uıymdastyryldy.