Elordalyq balalar jazǵy demalysyn Londonda ótkizedi
NUR-SULTAN. QazAqparat - Elordada «OPEN MIND» qaıyrymdylyq jobasy aıaqtalyp, onyń qorytyndysy boıynsha áleýmettik az qamtylǵan otbasylardan shyqqan úsh bala jazǵy kanıkýlda Londonǵa barady, dep habarlaıdy QazAqparat qala ákimdiginiń resmı saıtyna silteme jasap.
Úsh aı boıy elordanyń «Almaty» aýdanynda az qamtylǵan otbasylardan shyqqan 500 bala qazirgi zamanǵy baǵdarlamalar boıynsha aǵylshyn tilin tegin oqydy. Arnaıy synaqtan jáne suhbattasýdan ótken úsh úzdik Anglııaǵa demalysqa barady.
Budan basqa, synaqtardy sátti tapsyryp, prezentatsııa daıyndaǵan úsh daryndy muǵalim brıtandyq baspalardyń birindegi Afıny fılıalynda biliktiligin arttyrý kýrsynan ótedi.
Joba «Rýhanı jańǵyrý» baǵdarlamasy aıasynda «Men almatylyqpyn» qoǵamdyq qozǵalysy, Nur-Sultan qalasynyń «Almaty» aýdany ákimdigi jáne «Nur Otan» partııasynyń qoldaýymen ótti. Jobanyń resmı jabylýynda, jobanyń jeńimpazdaryna Ulybrıtanııaǵa joldama berildi, barlyq qatysýshylar sertıfıkattar men alǵys hattar aldy.
