Elordalyq azamat búgin Astanadan Mekkege jaıaý attanady
ASTANA. QazAqparat - Qajylyqqa jaıaý barǵan babalarymyz jaıynda tarıhtan bilemiz. Al qazirgideı órkenıet damyǵan zamanda aıshylyq alys joldarǵa alty saǵatta jetýge bolady. Sondyqtan shyǵar, babalar izimen Paıǵambar shaharyna jaıaý barýǵa kelise qoıatyndar joqtyń qasy. Alaıda, qanymyzdaǵy tektilik boıymyzdan áli joǵalmapty. Elordalyq Dýlat Imanqajy búgin - Astana kúni «Nur-Astana» ortalyq meshitinen Mekkege attanbaq. Ol jeti myń shaqyrym qashyqtyqtaǵy mekenge deıin júgirip baryp, kishi qajylyǵyn ótep kelýge nıettenip otyr, dep jazady «Astana aqshamy».
Juqaltań sary óńdi, jińishke, orta boıly Dýlat erdiń jasy - elýge taıaǵan. Mamandyǵy - qarjyger. 2006 jyldan bastap júgirýdi qolǵa alǵan. «Sol tusta densaýlyǵym syr berip júretin, úılengenime on jyl bolsa da perzentim joq edi. Sportqa kelgennen keıin jaǵdaıym da túzeldi, Tomırıs esimdi qyzym dúnıege keldi. Qazir ol jeti jasta. Tórt jyldan beri Astana qalasyndaǵy №56 mektep-lıtseıde shańǵy úıirmesiniń bapkerimin» deıdi marafonshy. Eń alǵash júgirýin asa kórnekti memleket jáne qoǵam qaıratkeri Dinmuhamet Qonaevtyń toqsan bes jyldyq mereıtoıyna arnapty. «Qaqaǵan qysta Almatydan Baqanasqa deıin marafon jasadym. Qatty qınalsam da, mejege aman-esen jettim»,- dep aǵynan jarylady ol. Astana toıynda bastalatyn Astana-Mekke-Astana marafonyna úsh aıdaı ýaqyt ketetin kórinedi. «Mekkege deıin júgirý jolymdy eseptegende, jeti myń shaqyrymǵa tabanym tıedi eken, qaıtýym - taǵy jeti myń shaqyrym. Jol boıy Ázerbaıjan, Iran, Kýveıt, Saýd Arabııasy elderiniń topyraqtaryn basyp ótedi ekenmin. Átteń, jolymnyń jartysynan kóbisi ystyqqa túseıin dep tur. Qudaı qýat bersin!» deıdi D.Imanqajy. Marafon sportynyń tarıhyna úńilsek, jer betindegi eń myqty júgirýshilerdiń ózi on kúnnen artyq jolda bolmapty. Al bolashaq qajymyzdyń marafony úsh aıǵa sozylmaq.
