Elordalyq avtobýstardyń 70 paıyzy jańartyldy
NUR-SULTAN. QazAqparat - Elordadaǵy qoǵamdyq kólikterdiń 70 paıyzy jańartylǵan. Bul týraly «Astana LRT» JShS basqarma tóraǵasynyń orynbasary Beıbit Esjanov aıtty, dep habarlaıdy QazAqparat tilshisi.
Qoǵamdyq kóliktiń qatysýymen bolatyn jol-kólik oqıǵalarynyń aldyn alý máselelerin talqylaǵan jıynda «Astana LRT» JShS ókili tehnıkany jańalaý boıynsha keshendi jospar iske asyrylyp jatqanyn atady.
«Qoǵamdyq kólikterdi jańalaýmen qatar júrgizýshilerdiń tapshylyǵyn azaıtýǵa da kúsh salyp kelemiz. Jyl basynan beri mamandar tapshylyǵy 200 adamǵa azaıtyldy. Birte-birte avtokásiporyndardyń shtattary 100 paıyz tolyǵýy tıis. Tehnıkany jańalaý baǵytynda 400 eski avtobýsty aýystyrdyq, osylaısha avtoparkter 70 paıyzǵa jańartyldy» - dedi Beıbit Esjanov.
