Elordalyq aýla klýbtary «AULA CLUB» brendimen jańa formatta jumys istemek
ASTANA. QazAqparat - Astanadaǵy eń úlken «Jas qanat» aýla klýby jańasha jumys isteıtin bolady. Endi klýbtyń ózindik stıli bar, kelýshilerdi esepke alatyn onlaın-baǵdarlama ázirlenip, jańa sektsııalar men baǵyttar ashyldy. Jyl sońyna deıin elordalyq 11 aýla klýbynyń barlyǵy jańartylyp, biryńǵaı AULA CLUB brendimen jumys isteıtin bolady, dep habarlady qalalyq ákimdiktiń baspasóz qyzmetinen.
- Aýla klýbtary degende, Keńes zamany kóz aldyńa elesteıdi. Al biz bolsaq, jańa zamanaýı AULA CLUB brendin jasap shyǵardyq, ol barlyq aýla klýbtaryn qamtıdy. Olardyń árqaısysynyń ózindik stıli, qyzyqty dızaıny bolady. Birinshi kezeńte, eń úlken klýbtar ózgertiledi, jyl sońyna deıin barlyq jumystar aıaqtalmaq, - dedi «Astana jastary» KMM aqparatty taldaý jáne monıtorıngi men ádistemelik jumys bóliminiń basshysy Aıda Sanat.
Onyń aıtýynsha, qazirgi kezde aýla klýbtaryna negizinen balalar ǵana barady, al aldaǵy ýaqytta jastar jınalatyn, túrli úıirmeler uıymdastyrylatyn ortalyqtar qurý josparlanǵan.
Jańartylǵan «Jas qanat» aýla klýbynda qazirgi zamanǵy skaýttar qozǵalysynyń jastar ortalyǵy ashyldy.
- Balalar lagerge barady, taýǵa, ashyq dalalarǵa shyǵady, ot jaǵyp úırenedi - jastar úshin munyń bári qyzyq nárse. Sondaı-aq, jas astanalyqtar teatr ónerimen, ıogamen, tehnıkalyq shyǵarmashylyqpen tanysady, - deıdi Aıda Sanat.
Búgingi tańda klýbtarda túrli sektsııalar ótkiziledi, sonyń ishinde karate, boks, erkin kúres, qoıan-qoltyq kúres, dzıýdo, ústel tennısi, shahmat, doıby bar. Sonymen qatar, bı, mýzyka, beıneleý óneri jáne qoldanbaly óner sııaqty shyǵarmashylyq úıirmeler de jumys isteıdi.
