Elordalyq ata-analar balasynyń mektep ashanasynan ne satyp alǵanyn baqylaı alady
ASTANA. QazAqparat - Qalalyq bilim basqarmasy oqýshyǵa arnalǵan jol júrý kartasy arqyly tamaqqa tólem jasaýǵa jáne mektepke kirýge ruqsatnama beretin pılottyq joba daıyndaýda, dep habarlaıdy Astana qalasy ákimdiginiń resmı saıty.
Tsıfrlandyrý aıasynda bilim basqarmasy júktemesi aýyr mektepterde tamaqqa tólem jasaý úshin jol júrý kartasyn paıdalaný pılottyq jobasyn qolǵa almaq. Qalalyq bilim basqarmasynyń basshysy Ánýar Janǵozınniń aıtýynsha, ár oqýshyda mektepke kirýge arnalǵan kartochka bar, ol týrnıketten ótkende onyń mektepke kelgeni belgilenedi. Oqýshylar sol karta arqyly mektep ashanasynda jáne jol júrý aqysyn tóleıtin bolady.
Osylaısha ata-ana balasynyń qaı kezde ne satyp alǵanyn baqylaı alady.
«Termınal nemese onlaın túrde ata-ana jol júrý kartasyn tolyqtyra alady jáne balaǵa jeýge bolmaıtyn taǵam túrlerine shekteý qoıý múmkindigi bar, ıaǵnı bala ashanada ata-anasy shekteý qoıǵan taǵam túrlerin satyp ala almaıdy. Tólem kartadaǵy balanstan alynady, kartadaǵy birlik sheshilgen kezde ata-anaǵa habarlama keledi. Ashanada qolma qol aqshalaı tóleý kezek týdyrady, sol sebepti de osy júıe mektepke de, ata-anaǵa da yńǵaıly», - deıdi Á. Janǵozın.
Bilim basqarmasynyń aqparaty boıynsha bul pılottyq joba qaladaǵy 27, 54, 59 mektepterinde birer apta buryn bastalǵan. Al bul jobany basqa da mektepterge engizý máselesi ekinshi toqsannan keıin sheshiledi.
