Elordalyq ata-analar balalarynyń oqý úlgerimin smartfon arqyly baqylaı alady
ASTANA. QazAqparat - Jańa oqý jylynan bastap ata-analar balalarynyń oqý úlgerimin smartfondar nemese planshetter arqyly elektrondyq túrde baqylaı alady. Bul Astana Learning Management System jobasyn iske qosýdyń arqasynda múmkin bolyp otyr. Bul týraly Astana qalalyq bilim basqarmasynyń baspasóz qyzmetinen habarlady.
Vedomstvo aqparatyna qaraǵanda, ol Edupage portaly arqyly júzege asyrylady. Bul júıe veb-saıt túrinde ári smartfondar men planshetterge arnalǵan mobıldik qosymsha úlgisinde qoljetimdi.
Edupage portaly arqyly kez kelgen ýaqytta sabaqtardyń kestesin, aǵymdaǵy baǵalardy, úı jumysyn, sabaqqa qatysý jýrnaly, ashananyń máziri týraly habardar bolyp, oqytý materıaldaryn paraqtaýǵa jáne oqýshylardyń ata-analary arasyndaǵy saýalnamalarǵa qatysýǵa múmkindik bar. Júıe arqyly mekteptiń jańalyqtary týraly aqparatty, aldaǵy jınalystar nemese sharalar jaıly málimetter táýlik boıy qoljetimdi bolady. Sonymen qatar bul ata-analar úshin árbir ustazben jáne mekteptiń ákimshiligimen tikeleı baılanys ornatýǵa jol ashady.
Árbir mektep úshin lıtsenzııalyq baǵdarlamalyq qamsyzdandyrýdyń quny 100 myń teńge tursa, ata-analar úshin tegin usynylady. Ol úshin Edupage baǵdarlamasyn júkteý qajet (smartfondar úshin Play Market, iPhone úshinApp Store arqyly). Júıe mektepte iske qosylǵan kezde atalǵan bilim oshaǵynyń ákimshiligi árbir oqýshy úshin qupııasóz beredi.
Edupage baǵdarlamasynyń resmı seriktesi jáne dıstrıbıýtorynyń (USTAZ Professional Learning Center JShS) sózinshe, bul baǵdarlamanyń jumysyna ınternettiń eń tómen jyldamdyǵy qajet.
Ustazdar qaýymyna bul júıe sabaqtar kestesin avtomatty túrde qurýǵa, barlyq baǵalardy jáne úı jumysyn elektrondyq túrde tirkeýge múmkindik beredi. Olarǵa mekteptegi jańalyqtar, kestedegi ózgerister týraly der kezinde aqparattandyrý úshin qosymsha ýaqyt bólýdiń qajeti artta qalmaq.
