Elordalyq ardagerlerge Jeńis kúnine oraı 150 myń teńgeden áleýmettik qoldaý kórsetilmek
Atap aıtqanda, 258 soǵys ardagerleri men múgedekterine 150 000 teńge kóleminde qarajat berilmek, dep habarlady Astana ákimdiginiń baspasóz qyzmetinen.
«Jeńis kúnine oraı, kelesi sanattar boıynsha arnaıy memlekettik járdemaqy alýshylarǵa materıaldyq kómek kórsetý kózdelip otyr: 1-shi sanat boıynsha - 1941-1945 jyldar aralyǵyndaǵy Uly Otan soǵysyna qatysqandar men múgedekter - 150 myń teńgeden, 2-shi sanat boıynsha - jeńildikter men kepildikter boıynsha UOS qatysýshylary men múgedekterine teńestirilgender - 20 myń teńgeden alady, olardyń dárejesi Qazaqstan Respýblıkasynyń «UOS qatysýshylary, múgedekteriniń jeńildikteri men olardy áleýmettik qorǵaý týraly» Zańynyń 6 jáne 8-baptarymen anyqtalǵan», - dep habarlady elordalyq Jumyspen qamtý jáne áleýmettik qorǵaý basqarmasynan.
Sonymen birge, jeńildikter men kepildikteri boıynsha soǵysqa qatysqandarǵa teńestirilgenderge, soǵys jyldary tylda jumys istegender men qaza bolǵan áskerı qyzmetkerlerdiń otbasylaryna 10 myń teńgeden berý qarastyrylǵan.
Sondaı-aq Jeńis kúni merekelik kontsertter, eńbek ujymdarynda soǵys ardagerlerimen kezdesýler uıymdastyrylyp, estelik syılyqtar tabystalady.
Merekelik sharaǵa kelýge múmkindikteri joq ardagerler Jeńis kúni qarsańynda úılerinde quttyqtalmaq. Qart maıdangerlerge azyq-túlik qorjyny men estelik syılyqtar tabystalady, sonymen birge, shıpajaılarǵa joldamalar berildi.
