Elordalyq «Alaý» muz aıdyny saraıynda jappaı syrǵanaý maýsymy aıaqtalady
NUR-SULTAN. QazAqparat - 14 sáýirde «Alaý» muz aıdyny saraıynda jappaı syrǵanaý maýsymy aıaqtalady. Osyǵan oraı, 5 seans boıy kelýshilerge túrli oıyn-saýyq sharalary ótkiziledi, dep habarlaıdy QazAqparat.
Qalalyq Mádenıet jáne sport basqarmasynyń málimetinshe, qatysýshylarǵa syılyqtar tartý etiledi, qyzyqty oıyndar uıymdastyrylady. Alǵashqy seansta kásipqoı jattyqtyrýshylar trenıng ótkizedi. Seans sońynda qonaqtar «Masstart» jarysyna qatysyp, sheberlik baıqasady.
Ekinshi seans short-trek áýesqoılaryna arnalady. Korttardyń birinde short-trekten kásipqoı jattyqtyrýshy óz tájirıbesimen bólisedi.
Mánerlep syrǵanaýǵa áýes jandar úshinshi seansqa kele alady. Onda mánerlep syrǵanaýshylar óz ónerlerin ortaǵa salady, sondaı-aq muz aıdynynda jappaı fleshmob uıymdastyrylady.
Hokkeı súıer qaýym tórtinshi seansqa qatysady. Onda eki komanda jarysqa túsedi.
Besinshi seansta júrgizýshiler muz aıdynynyń jattyqtyrýshylarymen birge kelýshiler úshin túrli oıyndar ótkiziledi. Jeńimpazdarǵa estelik syılyqtar beriledi.
Sáýirdiń aıaǵynda «Alaý» muz aıdyny jazǵy jumys rejimine kóshedi. Jaqyn arada jazǵy sport ortalyǵy óz jumysyn bastaıdy.
Eske salaıyq, 2018 jyldyń 3 qarashasynda «Alaý» muz aıdyny saraıynda jappaı konkımen syrǵanaý maýsymy bastalǵan bolatyn. Osy ýaqyt ishinde 135 myńnan astam elorda turǵyny men qonaǵy konkımen syrǵanaýǵa kelgen. Maýsym boıy túrli jarystar men sharalar uıymdastyryldy. Mysaly, jappaı syrǵanaý aıasynda BAQ ókilderiniń, elordalyq teatr artısteriniń, jáne saraı qonaqtarynyń arasynda jarystar ótkizildi.
Maýsymnyń jabylý rásimi 2019 jyldyń 14 sáýirinde saǵat 09.00 men 23.00 aralyǵynda ótedi.
