Elordalyq affınajdyq zaýyt 2019 jyly 25 tonna altyn óndiretin bolady (FOTO)
2012 jylǵy 3 shildede «Astana - jańa qala» ındýstrııalyq parki aýmaǵynda «Taý-Ken Altyn» JShS affınajdyq zaýyty qurylysynyń bastalýynyń belgisi - kapsýla salynyp, alǵashqy dińgegi qaǵylǵan bolatyn. 2013 jylǵy 19 jeltoqsanda atalǵan zaýyt Elbasynyń qatysýymen iske qosyldy.
Joba qundy metaldardy affınajdaý salasyndaǵy álemniń úzdik tehnologııalaryna sáıkes salyndy. Osyǵan baılanysty tehnologııalyq protseste qoldanylatyn qondyrǵymen jıyntyqta tolyqtaı ekologııalyq qaýipsizdikti, quramyndaǵy qospalar mólsheri joǵary sapasy tómen shıkizat túrlerin qaıta óńdeý múmkindigin, taýar ónimin tazartýdyń joǵary deńgeıin, tazalyǵy kem degende 99,99% daıyn ónim alýdy qamtamasyz etetin elektrohımııalyq ádis tehnologııasy da tańdaldy.
Dırektordyń ekonomıka jáne qarjy jónindegi orynbasary Janar Rahımovanyń aıtýynsha, 2014 jyly zaýyt Qazaqstannyń Ulttyq bankine altyn valıýta rezervin tolyqtyrý úshin satylǵan 7 myń tonnaǵa jýyq altyndy affınajdady. Zaýyttyń 2015 jylǵy jospary - 10 tonna altyn men 10 tonna kúmis. Aldaǵy ýaqytta kásiporyn qýattylyǵy 25 tonna altyn men 50 tonna kúmisti quraıtyn bolady, buǵan 2019 jyly qol jetkizilmek.
Zaýytta jalpy, 74 adam, sonyń ishinde 56-sy óndiriste jumys isteıdi. Qaıta óńdeýge arnalǵan shıkizatty 29 jabdyqtaýshy jetkizedi. 20 tonna shıkizattan orta eseppen 10 tonna taza daıyn ónim shyǵady. Shıkizat Qazaqstannan ǵana: Qostanaı, Aqbaqaı, Qaraǵandy ken oryndary men Shyǵys Qazaqstan oblysy aýmaǵynan alynady.
«Shıkizat zaýytqa kelip túskennen keıin ólshenip, synama alynady. Taldaý nátıjeleri maquldanǵan jaǵdaıda, jabdyqtaýshyǵa aqy tólenip, materıal tehnologııalyq protseske túsedi. Kásiporynda 7 ındýktsııalyq pesh bar. Materıal qaıta balqytylyp, gomogendeledi, naqty taldaý úshin taǵy da synama alynady. Altynnyń quramyna baılanysty materıal elektrohımııalyq affınajǵa jóneltiledi. Budan soń katodty altyn qaıtadan altynǵa balqytylady. Odan ári túıirshekter ındýktsııalyq peshterge salynyp, bank quımalary jasalady»,-deıdi «Taý-Ken Altyn» JShS bas tehnology Asqar Tleýlın.
Bir quıma altynnyń salmaǵy 12 kg, quny - 500 myń dollar. Búginde zaýytta salmaǵy 100 gramnan 1 kılogramǵa deıingi ólsheıtin ınvestıtsııalyq quımalardy shyǵaratyn qondyrǵy bar. Jaqyn arada halyqqa altyn men kúmis satý múmkindigi paıda bolmaq.
