Elordalyq 8 myńnan astam dáriger shetelde bilim alady
ASTANA. QazAqparat - Aǵymdaǵy jyly 8 myńnan astam astanalyq dáriger sheteldiń jetekshi klınıkalarynda bilimderin jetildiredi, dep habarlaıdy QazAqparat tilshisi Astana qalasynyń Qoǵamdyq densaýlyq saqtaý basqarmasynyń baspasóz qyzmetine silteme jasap.
Bıylǵy jyly el ishinde jáne odan tys jerlerde - Izraıl, Ońtústik Koreıa, Reseı, Fınlıandııa jáne Kanadanyń jetekshi klınıkalarynda shamamen 8 myń elordalyq dáriger men medbıkeni oqytý josparlanyp otyr. Odan bólek 70 medıtsına qyzmetkeri jańa medıtsınalyq tehnologııalardy engizý boıynsha bilim alady.
Sondaı-aq korporatıvtik basqarýdy damytý máseleleri boıynsha 2017 jyly 4 049 medıtsına qyzmetkeri densaýlyq saqtaý menedjerlerin oqytý, medıtsınalyq aǵylshyn tilin oqytý, dıagnostıkalaý men emdeýdiń joǵary tehnologııalaryn engizý boıynsha bilimderin jetildirdi, dep habarlaıdy qoǵamdyq densaýlyq basqarmasy.
Basqarma basshylyǵynyń derekterine súıensek, bıyl elimizde tuńǵysh ret 18 medıtsına qyzmetkeri Nazarbaev Ýnıversıtetiniń Medıtsına mektebinde meıirbıkelik menedjment baǵdarlamasy boıynsha dáris aldy. Bul óz kezeginde medıtsınalyq kómekti damytýǵa qosymsha serpin beredi.
Qazirgi tańda akýsherlik, shuǵyl kómek, hırýrgııa, densaýlyq saqtaý menedjmenti jáne t.b. mamandardy úzdiksiz oqytý úshin úzdik halyqaralyq klınıkalarmen yntymaqtastyq máselesi qarastyrylýda.
Aıta ketý kerek, biliktilikti arttyrý boıynsha júrgizilgen jumystardyń arqasynda Qazaqstanda alǵash ret osteosıntez jáne kishi jambas súıeginiń synýy boıynsha eki ozyq operatsııa jasaý engizildi.
