Elordalyq 49 kásiporyn energııa resýrstaryn tutynýdy 25% tómendetedi
ASTANA. 23 qańtar. QazAqparat - Astanada 49 kásiporyn 5 jyldyń ishinde energııa resýrstaryn tutyný kólemin 25% tómendetedi. Bul másele QR Prezıdentiniń «Qazaqstan joly - 2050: Bir maqsat, bir múdde, bir bolashaq» atty halyqqa Joldaýyn talqylaý boıynsha ótken otyrysta qaraldy.
Elordada Memleket basshysy óz Joldaýynda alǵa qoıǵan energııa únemdeý tehnologııalaryn engizý mindetin oryndaý maqsatynda 2013-2015 jyldary Energııa únemdeý jónindegi keshendi jospar iske asyrylatyn bolady.
Atalǵan jospar aıasynda búginde jylyna 1500 tonnadan astam shartty otyn tutynatyn kásiporyndardyń memlekettik energetıkalyq tizilimi ázirlendi. Taldaýǵa sáıkes, búgingi tańda Astanada osyndaı 49 nysan jumys isteıdi. Otyrys barysynda 5 jyldyń ishinde osy kásiporyndar energııa resýrstaryn tutyný kólemin kem degende 25% tómendetý boıynsha mindettemelerdi qabyldaı otyryp, ókiletti jáne jergilikti atqarýshy organdarmen kelisim jasaıdy.
Aıta keteıik, elordada jylý energııasyn esepteý quraly, jylý tutynýdy retteýdiń avtomattandyrylǵan júıesi, sorǵy stantsııalarynda jıiliktik retteý túrlendirgishteri sekildi mehanızmderdi engizý energııa shyǵyndaryn 20% jýyq azaıtýǵa múmkindik berdi.
