Elordalyqtarǵa ınternet-alaıaqtyqtyń jańa túri týraly eskertý jasaldy
ASTANA. KAZINFORM — Astana turǵyndaryna jańa alaıaqtyq aıla-sharǵylar týraly eskertý jasaldy. Bul týraly QR Bas prokýratýrasy Quqyqtyq statıstıka jáne arnaıy esepke alý komıtetiniń Qoǵamdyq qaýipsizdik qaterleri men táýekelderin boljaý ortalyǵy habarlady.
Qaskóıler messendjerler men SMS arqyly «jetkizilmegen sálemdeme» týraly jalǵan habarlamalardy jappaı taratyp jatyr.
Alǵash qaraǵanda mundaı habarlamalar zııansyz kórinedi jáne kýrerlik qyzmetterdiń ádettegi eskertýlerine uqsaıdy.
— Habarlamada kýrer sálemdemeni jetkize almaǵany aıtylyp, qaıta jetkizýdi rásimdeý úshin arnaıy siltemege ótýdi usynady. Alaıda kórsetilgen silteme logıstıkalyq kompanııalardyń resmı saıttaryna uqsatyp jasalǵan jalǵan saıtqa aparady. Onda paıdalanýshydan jeke derekterin — aty-jóni, JSN, turǵylyqty mekenjaıy, sondaı-aq jetkizýdi qaıta rásimdeý úshin az mólsherde tólem engizý suralady, — delingen habarlamada.
Bul málimetterdi engizip, tólem jasaǵannan keıin alaıaqtar qupııa aqparat pen bank derekterine qol jetkizedi. Bul qarjylyq shyǵyndarǵa ǵana emes, jeke derekterdiń basqa da qylmystyq shemalarda paıdalanylýyna ákelýi múmkin.
Alaıaqtardyń qurbany bolmas úshin mynadaı qarapaıym, biraq mańyzdy saqtyq sharalaryn saqtaý qajet:
• eger jetkizilim kútpeseńiz, messendjerler men SMS-tegi siltemelerge ótpeńiz;
• saıttyń mekenjaıyn muqııat tekserińiz — alaıaqtyq resýrstar kóbine bir-eki árippen nemese belgilermen ǵana erekshelenedi;
• kúmándi saıttarǵa jeke jáne bank derekterin engizbeńiz;
• jetkizilim statýsyn tek resmı saıttar men qosymshalar arqyly tekserińiz;
• kúmándi habarlamalardy elemeı, olardy buǵattańyz.
Alaıaqtar azamattardyń sengishtigin jáne jetkizilim týraly habarlamalarǵa jyldam áreket etý ádetin belsendi paıdalanady.
Sondyqtan mundaı shemalar tez taralyp, kez kelgen adamǵa qaýip tóndirýi múmkin. Tsıfrlyq ortada saqtyq tanytý — qarjylyq shyǵyn men jeke derekterdiń taralýynan qorǵanýdyń eń tıimdi joly.
Aıta keteıik, buǵan deıin kıberalaıaqtyqty ashý kórsetkishi 29%-ǵa óskenin jazǵan edik.
