Elordalyqtardyń LRT ıgiligin kórýi 1 jylǵa shegerilýi múmkin

ASTANA. KAZINFORM — Búgin Premer-mınıstrdiń orynbasary Roman Sklıar elordadaǵy LRT qashan paıdalanýǵa beriletinin aıtty. 

Aqordada BAQ ókilderi birinshi vıtse-premerden LRT qashan paıdalanýǵa beriletindigin suraǵan edi. Saýalǵa jaýap bergen ol qarjylandyrýdyń bar ekenin, jaqynda testilik rejımde iske qosý júrgiziletindigin aıtty.

— Kelesi jyldyń sońynda. Kelesi jyly astanalyqtar qatynaı bastaıdy, — dedi Roman Sklıar.

Aıta keteıik, «CTS» JShS basqarma tóraǵasy Asylbek Dúısebaev qyrkúıek aıynda LRT-ny testilik rejımde iske qosý, ıaǵnı jolaýshysyz poıyzdardy synaqtan ótkizý josparlanyp otyrǵanyn aıtty. 

Jeńil relsti kólik jobasy ozyq GoA4 standartyna sáıkes júzege asyrylyp jatyr, bul 6 aılyq synaq merzimin talap etedi.

24 mamyrda Qytaıdyń Tanshan qalasynda Astana qalasyna arnalǵan LRT vagondarynyń alǵashqy eki quramy jiberildi. 

Tanshan qalasyndaǵy zaýytta joba aıasynda barlyǵy 19 birlik jyljymaly quram jasalady. Zamanaýı, tórt sektsııaly, júrgizýshisiz júretin, avtomattandyrýdyń tórtinshi deńgeıindegi vagondardyń árqaısysy 650 jolaýshyǵa arnalǵan.