Elordalyqtar Jámıla Baqbergenovany áýejaıdan qoshemetpen qarsy aldy
ASTANA. KAZINFORM – Kúres túrlerinen Albanııa astanasy Tıranada ótken olımpıadalyq emes salmaq boıynsha álem chempıonatynda 72 kelide kúmis júldege ıe bolǵan Jámıla Baqbergenovany týystary, dostary áýejaıda qoshemetpen qarsy aldy. Bul týraly elorda ákimdiginiń resmı saıty habarlady.
Jámıla Baqbergenova – qazaq qyzdary arasynan 4 márte júlde alǵan alǵashqy balýan. 72 kelide synǵa túsken sportshy fınaldyq beldesýde birneshe kún buryn ǵana 23 jasqa deıingi álem chempıonatynda 68 kelide eń úzdik atanǵan japon sportshysy Amı Ishıge ese jiberdi.
Al fınalǵa deıingi beldesýlerde Jámıla Moldova sportshysy Emılııa Krechýnnen, Eýropa chempıonatynyń qola júldegeri chehııalyq Adel Ganzlıchkovadan, Azııa chempıony mońǵolııalyq Bolortýıaa Zorıgtannan basym túsken bolatyn.
«Bul týrnırde barlyq qarsylasymmen alǵash ret beldestim. Sebebi olardyń birshamasy 68 keliden kóterildi. Fınalda bapkerimniń nusqaýymen japon sportshysyn kútýim kerek edi. Upaı jaǵynan alda turǵanymen, bir ǵana qatelikpen ese jiberip qoıdym. Kúmis medalǵa da jetý ońaı bolmady. Endi áskerıler arasyndaǵy álem chempıonatyna tyńǵylyqty daıyndalamyn. Jalpy ózimdi 72 kelide jaıly sezinemin. Boıym da, dene bitimim de osy salmaqqa saı», - dedi Jámıla Baqbergenova.
Aıta keteıik, atalǵan álem chempıonatynda sportshylarymyz 1 altyn, 2 kúmis medal enshiledi.
