Elordalyqtar uzaq ómir súre bastady: týberkýlez, ınsýlt pen náreste ólimi azaıdy

ASTANA. KAZINFORM — Astanada ómir súrý uzaqtyǵy el boıynsha eń joǵary deńgeıge jetti, dep habarlaıdy Astana ákimdiginiń resmı saıty.

Elordada qazirgi ýaqytta ómir súrý uzaqtyǵy el boıynsha josparlanǵan deńgeıden 3,5 jylǵa joǵary, al 2029 jylǵa belgilengen maqsatty kórsetkishten 2 jylǵa asyp otyr. Bul týraly qala Densaýlyq saqtaý basqarmasynyń orynbasary Aınur Tóleýova málim etti.

Basqarma basshysy orynbasarynyń málimetinshe, ásirese Astanada týberkýlezge qarsy kúrestegi jetistikter aıtarlyqtaı jaqsarǵan.

— Aýrýshańdyq 21,5%-ǵa, al ólim-jitim 6,5%-ǵa azaıdy. Insýltti emdeýde gospıtaldyq ólim-jitim 8%-ǵa tómendedi, al aýrýhanadan shyqqannan keıin úıde bir aı ishinde bolatyn ólim-jitim 32%-ǵa azaıdy. Onkologııalyq kómekti erte anyqtaý úlesi ósip keledi: qazirgi tańda aýrýlardyń 34,6%-y bastapqy kezeńde dıagnostıkalanýda, bul kezde emdeý eń tıimdi, — dep atap ótti ol.

Sonymen qatar, mıokard ınfarktisin emdeýdegi kórsetkishter aıtarlyqtaı jaqsarǵan: barlyq patsıent usynylǵan 120 mınýt ishinde teri arqyly koronarlyq aralasý ortalyǵyna jetkiziledi.

Jedel járdemniń kelý ýaqyty da qysqartylǵan — shaqyrýlardyń 98,1%-y 40 mınýt ishinde oryndalyp jatyr.

Vedomstvo ókili sonymen qatar náresteler arasyndaǵy ólim-jitim kórsetkishterindegi oń ózgeristerdi de atap ótti. Mysaly, tuqym qýalaıtyn damýdaǵy aqaýlardan bolatyn ólim-jitim eki esege tómendep, 14-ten 8 jaǵdaıǵa deıin qysqardy. Sondaı-aq, bıyl ınfektsııalyq sebepterden bolatyn ólim-jitim tirkelgen joq.

Buǵan deıin Astanada balalardyń quqyqtaryn qorǵaý jónindegi jańa basqarma qurylatyny málim boldy.