Elordalyq jasóspirim shahmattan Qazaqstan chempıony atandy
ASTANA. KAZINFORM – Astanadaǵy Coventry University Kazakhstan alańynda klassıkalyq shahmattan erler men áıelder arasyndaǵy 2026 jylǵy Qazaqstan Respýblıkasynyń chempıonaty óz máresine jetti.
El birinshiliginde 15 jastaǵy astanalyq shahmatshy Saýat Nurǵalıev sensatsııalyq nátıje kórsetip, Qazaqstan chempıony atandy.
Jas sportshy 13 týr qorytyndysy boıynsha 5 jeńis, 8 teń oıyn kórsetip, birde-bir partııada jeńilmeı, 9 upaı jınady.
Nátıjesinde ol Qazaqstan chempıony atanyp, osy jyldyń eń úzdik shahmatshysy ataǵyn ıelendi.
Sondaı-aq erler arasyndaǵy jarysta taǵy bir elordalyq shahmatshy Jandos Aqmanov 8,5 upaımen kúmis júldege qol jetkizdi. Al qola júlde almatylyq Ramazan Jalmahanovtyń enshisine buıyrdy.
Áıelder arasyndaǵy doda sońǵy sekýndtarǵa deıin tartysty ótti. Tórt shahmatshynyń upaıy teń túsip, chempıon taǵdyry qosymsha kórsetkishter men taı-breık arqyly sheshildi. Rapıd jáne blıts oıyndarynyń nátıjesinde astanalyq Merýert Kamalıdenova kúmis júldeger atandy. Birinshi oryndy atyraýlyq sportshy Zarına Nurǵalıeva ıelense, qola júlde shymkenttik shahmatshy Elnaz Qalıahmetke buıyrdy.
Aıta keteıik, bul chempıonat ulttyq quramaǵa irikteýdiń mańyzdy kezeńi sanalady. Sondaı-aq jeńimpazdar Qazaqstan atynan halyqaralyq jarystarda, sonyń ishinde Dúnıejúzilik shahmat olımpıadasynda óner kórsetý múmkindigine ıe bolady.
Aıta ketelik shahmatshy Alýa Nurman FIDE álemdik reıtıngisinde úzdik úshtikke engen edi.
