Elordalyq jasóspirim halyqaralyq poshta arqyly marıhýana aldyrǵan
ASTANA. KAZINFORM — Elordalyq jasóspirim halyqaralyq poshta arqyly iri kólemde marıhýana aldyryp, ony satpaq bolǵan. Bul týraly Astana qalasy prokýratýrasynyń Memlekettik aıyptaýdy qoldaý jáne apellıatsııalyq satyǵa qatysý basqarmasynyń aǵa prokýrory Azamat Toqtarbaı aıtty.
— 2024 jyldyń naýryz jáne sáýir aılarynda kámeletke tolmaǵan jasóspirim óz úıinde otyryp, Telegram arqyly marıhýana esirtkisine tapsyrys bergen. Ony halyqaralyq poshta arqyly aldyryp, úıinde saqtaǵan. Keıin ol esirtkini saqtaý jáne satý maqsatynda dozaǵa bólý úshin arnaıy páter jaldaǵan. Páterdi tintý kezinde 998,43 gramm marıhýana tabyldy. Úkimettiń 2019 jylǵy 3 shildedegi qaýlysyna sáıkes, 50-den 1000 gramǵa deıingi marıhýana iri kólemdegi esirtkige jatady, — dedi aǵa prokýror OKQ alańynda.
2024 jylǵy 17 jeltoqsanda kúdikti jasóspirimdi sot iri kólemde esirtki zatyn zańsyz satyp alyp, saqtap, satý maqsatynda áreket etkeni úshin kináli dep tanydy.
— Ol bul áreketti aldyn ala sóz baılasý arqyly, elektrondyq aqparattyq resýrstardy paıdalana otyryp jasaǵan. Bul QK 297-babynyń 3-bóligi 1 jáne 5-tarmaqtaryna, sondaı-aq 28-baptyń 5-bóligi jáne 286-baptyń 2-bóligi 4 jáne 5-tarmaqtaryna sáıkes qylmys sanalady. Sol sebepti jasóspirim 8 jylǵa bas bostandyǵynan aıyryldy, — dedi Azamat Toqtarbaı.
Aıta keteıik, jýyrda Ulttyq qaýipsizdik qyzmeti eki halyqaralyq esirtki arnasyn joıǵanyn málimdegen edi.