Elordalyq jas túlekter LRT-da «Aq bantık» ánin shyrqady
ASTANA. KAZINFORM — Astanadaǵy № 91 mektep-gımnazııasy túlekteri sońǵy qońyraý qarsańynda erekshe formattaǵy áserli mýzykalyq fleshmob uıymdastyrdy, dep habarlaıdy elorda ákimdiginiń resmı saıty.
Jas túlekter balalyq shaqpen qoshtasý men aq armannyń sımvolyna aınalǵan Muhtar Shahanovtyń «Aq bantık» ánin elordadaǵy LRT vagonynda oryndap, kópshilikke erekshe kóńil kúı syılady.
Túlekterdiń aıtýynsha, bilim ordasynyń mańynan boı kótergen LRT olar úshin tek zamanaýı kólik ınfraqurylymynyń nysany ǵana emes, Astananyń qarqyndy damýy men bolashaqqa umtylysynyń belgisi. Sondyqtan mekteppen qoshtasý sátin qalanyń jańa damý kezeńimen baılanystyrý ıdeıasy oqýshylar tarapynan úlken qoldaý tapqan.
Aq jeıde men aq bantık taqqan túlekterdiń án oryndaýy jolaýshylarǵa erekshe áser qaldyrdy. Án arqyly olar mektep qabyrǵasyndaǵy balalyq shaqpen qoshtasý sezimin, ustazdarǵa degen alǵysyn, týǵan qalaǵa degen súıispenshiligin jáne bolashaqqa degen senimin jetkizýge tyrysty.
— Túlekterimizdiń tarıhı mektep bitirý sáti men LRT-nyń iske qosylý kezeńi qatar kelip otyr. Osy oraıda biz ulttyq qundylyqtarymyzdy dáriptep, jastardyń týǵan qalaǵa degen qurmetin kórsetý maqsatynda osyndaı erekshe is-shara uıymdastyrdyq. Bul túlekterdiń este qalarlyq sátteriniń biri bolady dep senemiz, — dedi mektep dırektorynyń tárbıe isi jónindegi orynbasary Gúlnár Ahmetova.
Aıta keteıik, bıyl Astanada 16 myńnan astap túlek mektep bitiredi.
Buǵan deıin qala ákimi Jeńis Qasymbek LRT jobasy tolyq iske assa, uzyndyǵy 100 shaqyrymǵa jetetinin aıtty.
