Elordalyq jas tennısshiler «Taza Qazaqstan» aktsııasyna qoldaý bildirdi
ASTANA. KAZINFORM — «Dáýlet» tennıs ortalyǵynyń jas tennısshileri «Taza Qazaqstan» aktsııasy aıasynda elordada ótip jatqan jalpyqalalyq senbilikke belsendi qatysty.
Ortalyq basshysy Dına Temirǵalıevanyń atap ótýinshe, mundaı is-shara turaqty túrde uıymdastyrylyp otyrady.
— Ózderińiz de kórip turǵandaı, tennıs ortalyǵynyń ishi de, syrty da muntazdaı taza. Óıtkeni, bizge tek sportshylar ǵana emes, sonymen birge qalanyń turǵyndary da únemi kelip turady. Sondyqtan tazalyq pen tártipti jiti qadaǵalaımyz, — dedi Dına Batyrǵalıqyzy.
Jas sportshylar jattyqtyrýshylarmen jáne ortalyq qyzmetkerlerimen birge mekemeniń tóńiregin qoqystan tazartyp, 15 top shyrsha otyrǵyzdy. Sonymen qatar tennıs korttaryn jýý jumystaryna da belsene aralasty.
— «Taza Qazaqstan» aktsııasyna qoldaý bildirip jatyrmyz. Mekeme qyzmetkerleri, sportshylar osy is-sharaǵa bir kisideı atsalysyp jatyr. Jalpy, mundaı tazalyq aktsııasy qarapaıym dúnıe bolyp kóringenimen mán-mańyzy zor. Senbilik adamzat balasyn tabıǵatty aıalaýǵa, oǵan qamqorlyq tanytýǵa, ekologııalyq mádenıetin arttyrýǵa, týǵan jerge degen janashyrlyq seziminiń oıanýyna úlken septigin tıgizedi, — dedi «Dáýlet» tennıs ortalyǵy sport bóliminiń ádiskeri Gúlnaz Jumabekova.
Senbilik uıymdastyrýshylary anımatorlardy da shaqyryp, senbilikke merekelik kóńil-kúı syılady.
Aıta keteıik, búgin elordada «Taza Qazaqstan. Astana — tazalyq pen tártiptiń úlgisi» aktsııasy aıasynda jalpyqalalyq senbilik ótip jatyr. Ekologııalyq aktsııa barysynda alty aýdanda 6 myńnan astam jasyl jelek otyrǵyzylady. Ekojoba aıasynda arnaıy taqyryptaǵy senbilikter, ekologııalyq sabaqtar, fleshmobtar, aqparattyq naýqandar jáne abattandyrý konkýrstary uıymdastyrylady.
Buǵan deıin Astanada aýqymdy jalpyqalalyq senbilik bastalǵanyn jazǵanbyz.