Elordalyq zaǵıp oqýshy Londonda top jardy
LONDON. KAZINFORM – Kózi kórmeıtin elordalyq oqýshy Londonda ótken «Altyn ýaqyttyń daryny» dep atalatyn óner baıqaýynda bas júldeni jeńip aldy. Abylaı Mustafın halyqaralyq konkýrsta qazaqstandyq avtorlardyń shyǵarmalaryn fortepıanoda oryndap, sheteldik qazylardyń joǵary baǵasyna ıe boldy, dep habarlaıdy Kazinform tilshisi.
Abylaı — Astanadaǵy Jumabek Táshenov atyndaǵy mektep-gımnazııasynyń 9-shy synyp oqýshysy. Ol sondaı-aq Roza Baǵlanova atyndaǵy 2-shi mýzykalyq mektepte bilim alady. Týǵanynan kózi kórmeıtin birinshi toptaǵy múgedek bolsa da, múmkindiginiń shekteýsiz ekenin dáleldedi. Buǵan deıin Habar telearnasynan kórsetilgen «Juldyzaı» baıqaýynda laýret atansa, búgin halyqaralyq óner dodasynda top jardy.
«Men jeńimpaz bolyp utyp jatqanyma baqyttymyn. Osyndaı múmkindik syılaǵany úshin mýzykalyq mektep muǵalimi Olesıa Ivanovnaǵa, anam men ákeme raqmet», — deıdi baıqaýdyń bas júldegeri Abylaı Mustafın.
Abylaı esepke de júırik. Germanııada jáne Túrkııada mentaldy arıfmetıkadan ótken olımpıadada top jaryp, júldeli orynǵa ıe boldy. Jas óren bolashaǵyn IT tehnologııalarmen baılanystyrǵysy bar. Baıqaýda almatylyq sýretshi Ásemgúl Súleımenova da bas júldeni qanjyǵalady.
«Meniń basty maqsatym osy qazaqı ónerdi, qazaqı naqyshtaǵy sýretterimdi álemge tanytý jáne osy bizde Qazaqstanda óner adamdary kóp ekenin, bar ekenin bildirý», — deıdi baıqaýdyń bas júldegeri Ásemgúl Súleımenova.
Baıqaýda baq synaǵandardyń 30 paıyzy otandastarymyz. Máselen, aǵaıyndy Gúlimaı, Dinmuhammed, Nurbaqyt Talap sahnaǵa shyǵyp, ulttyq ónerimizdi pash etti. Dombyrada oınap, qazaq kúıin kúmbirletti. Baıqaýǵa balalarmen qatar kásipqoı mýzykanttar da qatysty. Aralarynda Qurmanǵazy atyndaǵy qazaq ulttyq konservatorııasynyń professory da bar.
«Eń birinshiden, bizdiń úrlemeli aspap kvıntetimizge 20 jyl tolyp jatyr osy jyly. Soǵan arnap ádeıi kelip jatyrmyn. Qazaqstandy tanytýǵa, Qazaqstandy bilsin, kórsin degen oımen kelip jatyrmyz», — dedi Qazaqstannyń eńbek sińirgen qaıratkeri Janat Ermanov.
Tórtinshi jyl qatarynan ótip jatqan «Altyn ýaqyttyń daryny» atty halyqaralyq baıqaýdyń uıymdastyrýshysy Ýkraına azamattary. Olar mýzyka, beıneleý óneri, horeografııa jáne basqa da atalymdar boıynsha onlaın irikteýden ótken 25 eldiń ókilin Ulybrıtanııaǵa shaqyrǵan. Baıqaýǵa qatysý aqyly. Odan bólek vıza jáne jol shyǵyndary bar. Otandastarymyzdyń Londonǵa kelýine demeýshiler qoldaý kórsetken.
«Úlken daryn ıelerine arnalǵan dúbirli dodalar kóp. Bizdiń baıqaýǵa ózin áli tanytyp úlgermegen, biraq talantty óner adamdary qatysady. Bes jasar baladan bastap, 70-ten asqan aqsaqalǵa deıin sahnaǵa shyǵyp jatyr», — deıdi baıqaý uıymdastyrýshysy Innessa Bıla.
Jeńimpazdardyń esimderi baıqaýdyń resmı saıtyndaǵy úzdikter tiziminen tabylady. Ozyq oqý oryndarynan shaqyrýlar alyp, sheteldik kompanııalar olarǵa qyzmetter usynýy yqtımal. Daryndylar vızasyna ıe bolyp, Ulybrıtanııa men AQSh-ta ónerlerin shyńdaýǵa da múmkindik bar, deıdi uıymdastyrýshylar.
