Elordalyq ustaz jasandy ıntellektini oqytý protsesinde sátti qoldanyp júr
ASTANA. KAZINFORM — «Astana Hub» halyqaralyq tehnoparki edu.astanahub.com onlaın-bilim berý platformasyn iske qosty. Onda 19 myńnan astam oqýshy baǵdarlamalaý negizderin meńgerip, 300 muǵalim jasandy ıntellekt pen oıyn ázirleý baǵyttary boıynsha arnaıy oqýdan ótip jatyr. Bul týraly elorda ákimdiginiń resmı saıty jazdy.
Jobaǵa №85 sheıh Tamım ben Hamad ál-Tanı atyndaǵy mektep-lıtseıdiń ınformatıka páni muǵalimi Serikjan Qarsaqov ta qatysqan. Ol osy baǵdarlama arqyly óz ádistemesin ázirlep, búginde bul júıe Astananyń 9 bilim ordasynda – №1, 38, 48, 50, 59, 72, 73, 76 jáne 85 mektepterinde qoldanysqa engizildi.
– Jasandy ıntellekt kýrsy engizilgen sátten bastap men ony 10-11-synyptarda paıdalana bastadym. Balalardyń qyzyǵýshylyǵyn kórip, JI-di muǵalimniń kómekshisi retinde qoldandym. Ol muǵalimniń ýaqytyn únemdep, sabaǵyna daıyndalýǵa járdemdesedi. Bir sátte kez kelgen mátindi taldap, sabaq josparyn, prezentatsııa nemese qyzyqty test quraı alady. Jasandy ıntellekt sabaqtyń tıimdiligin arttyryp, balalarǵa saıt jasaýdy, neırojeliler arqyly taldaý júrgizip, reıtıngter jasaýdy úıretýge múmkindik beredi, – dedi pedagog.
Kórnekilik úshin Serikjan Qarsaqov «Oqýshylardyń jasandy ıntellektti paıdalaný daǵdylaryn damytý» taqyrybynda joǵary synyp oqýshylaryna ashyq ınformatıka sabaǵyn ótkizdi.
Bilim basqarmasynyń málimetinshe, tsıfrlyq saýattylyqty arttyrý maqsatynda 2024-2025 oqý jylynda 12 qalalyq semınar, al jańa oqý maýsymynda 2 semınar uıymdastyrylǵan.
– Astana Hub» tehnoparki aıasyndaǵy pılottyq joba boıynsha oqýdan ótken ınformatıka páni muǵalimderine 10-11-synyptarda «Jasandy ıntellekt» pen «Oıyn ázirleý» baǵytynda fakýltatıvtik kýrstar ótkizýge qosymsha saǵat bólindi. Bul kýrstar oqýshylardyń zamanaýı tsıfrlyq daǵdylaryn damytyp, IT salasyndaǵy kásibı baǵdaryn aıqyndaýǵa baǵyttalǵan. 2025-2026 oqý jylynan bastap №8, 9, 84 jáne 107 mektepterde jasandy ıntellekt kýrsyn engizý kózdelgen. Astana qalasynyń bilim basqarmasy JI-di bilim berý protsesinde tıimdi qoldaný boıynsha jyldyq jospar ázirledi, — dedi basqarmanyń baspasóz hatshysy Aıajan Amantaıqyzy.
Aıta keteıik, buǵan deıin aýyl muǵalimi aǵylshyn tilin úıretýdiń tyń tásilin usynǵanyn jazǵan edik.