Elordalyq ustaz temir tulpardy súırep, rekord jańartpaq
ASTANA. KAZINFORM — Elordalyq ustaz Aıgúl Erjanova birneshe tonna tartatyn aýyr júk kóligin ornynan qozǵap, súıreý arqyly jańa rekord ornatýdy josparlap otyr, dep habarlaıdy qala ákimdiginiń resmı saıty.
Astana qalasyndaǵy Raıymbek batyr atyndaǵy № 50 «Qazǵarysh» mektep-lıtseıiniń bastaýysh synyp muǵalimi Aıgúl Erjanovany kópshilik bilim men tárbıe salasyndaǵy bilikti maman retinde jaqsy tanıdy. 30 jyldyq eńbek ótili bar ulaǵatty ustaz — QR Prezıdentiniń qolynan «Qazaqstannyń eńbek sińirgen ustazy» ataǵyn alǵan el ardaqtysy. Alaıda Aıgúl hanymnyń bolmysy tek ustazdyqpen shektelmeıdi. Ol — erik-jigerdiń, tabandylyqtyń jáne naǵyz chempıon rýhynyń sımvolyna aınalǵan sport sheberi.
Aıgúl Erjanova sport álemine 52 jasynda qadam basyp, qysqa ýaqyt ishinde úlken jetistikterge jetti. Atap aıtqanda, alǵashqy 1,5 jyl ishinde 45 medal jeńip alyp, 8 márte rekord ornatqan. Onyń ishinde Mysyr elinde ótken halyqaralyq paýerlıftıng chempıonatynda qos altyn medal jeńip alyp, álemdik rekordty jańartýy — kópshiliktiń esinde.
Búginde Aıgúl hanym taǵy bir úlken synǵa daıyndalyp jatyr. Bul joly ol birneshe tonna tartatyn aýyr júk kóligin ornynan qozǵap, súıreý arqyly jańa rekord ornatpaq. Kózge názik, symbatty, taldyrmash áıel bolyp kóringenimen, onyń ishki qýaty men qaısarlyǵy kez kelgen jandy tań qaldyrady.
— Men árdaıym ózimdi jetildirýge, jańashyldyqqa umtylyp otyramyn. Bul áreketim arqyly ustaz da, áıel de, ana da kez kelgen armanyna jetý múmkin ekenin dáleldegim keledi, — deıdi Aıgúl Turǵanbaıqyzy.
Osydan buryn habarlanǵandaı, Almaty Marathon-2025 rekord jańartty.