Elordalyq stýdentter men oqýshylarǵa maıdangerler erligi týraly dáris oqyldy
ASTANA. KAZINFORM — Jeńis kúni qarsańynda QR PІB Prezıdenttik ortalyǵynda tarıhı estelikti saqtaý jáne Ekinshi dúnıejúzilik soǵys jyldaryndaǵy qazaqstandyqtardyń erligine arnalǵan «Qaharman qazaqstandyqtar. Soǵys qasireti» atty qonaq dárisi ótti.
Spıker retinde Toraıǵyrov ýnıversıtetiniń Qazaqstan tarıhy kafedrasynyń qaýymdastyrylǵan professory, PhD doktory Aslan Azerbaev sóz sóıledi.
Іs-sharaǵa elordadaǵy joǵary jáne orta bilim berý uıymdarynyń 90 stýdenti men joǵary synyp oqýshylary qatysty. Olar úshin oqýlyqtardaǵy qurǵaq derekter naqty izdestirý ekspedıtsııalary týraly áńgimeler arqyly jandanyp, erekshe áser qaldyrdy.
Kezdesýdiń mańyzdy bóligi «Maıdan joly» izdestirý jasaǵynyń qyzmetine arnaldy. 2009 jyldan beri qozǵalys eriktileri maıdan dalalarynda qalǵan jaýyngerlerdiń súıekterin izdep taýyp, qaıta jerleý jumystarymen aınalysyp keledi. Dáris barysynda Qazaqstandaǵy izdestirý qozǵalysynyń negizin qalaýshy, «Memorıaldyq aımaq» jasaǵynyń jetekshisi Maıdan Qusaıynovtyń tulǵasyna erekshe nazar aýdaryldy. Onyń kópjyldyq eńbegi elimizdegi estelik mádenıetiniń qalyptasýyna berik negiz qalady.
A. Azerbaev jastarmen 2010 jyly Reseıdiń Lenıngrad oblysyndaǵy Sınıavın bıiktikterinde ótken ekspedıtsııaǵa qatysý tájirıbesimen bólisti. Eriktilerdiń aýyr turmys jaǵdaılary men tabylǵan árbir jádigerdiń — jaýyngerdiń qazany men aty-jóni jazylǵan medalonǵa deıingi — qundylyǵy týraly áńgime tyńdaýshylarǵa tereń áser etti.
— Jer betinde áli kúnge deıin jaýyngerlerdiń súıekteri men jarylmaı qalǵan oq-dáriler jatqanyn kórgende, soǵystyń alysta qalǵan tarıh emes, jýyrda ǵana bolǵanyn túsinesiń, — dep atap ótti spıker.
Dáristiń jeke bólimi qazaq halqynyń dańqty qyzy, Keńes Odaǵynyń Batyry Mánshúk Mámetovanyń týǵanyna 95 jyl tolýyna arnaldy. Lektor Nevel shabýyl operatsııasy men Nevel qalasyn azat etý tarıhymen tanystyrdy. Bul jeńis 100-shi jeke atqyshtar brıgadasynyń jaýyngerlik erligimen júzege asqan. Sol shaıqastarda aty ańyzǵa aınalǵan mergen Ibrahım Súleımenov pen batyl qolbasshy Abylhaıyr Baımýldın erekshe atalyp ótti. Olardyń esimderi Pskov jerin azat etý tarıhyna máńgilikke jazyldy.
Sóz sońynda Aslan Azerbaev qatysýshylardy el tarıhyna beıjaı qaramaýǵa shaqyrdy. Ol jastardy otbasylyq muraǵattardy zerdeleýge, ardagerler men tyl eńbekkerleriniń estelikterin qasterlep saqtaýǵa úndedi.
Spıkerdiń aıtýynsha, árbir jas adamnyń óz otbasynyń tarıhyna degen jaýapkershiligi jalpyulttyq tarıhı esteliktiń berik negizin qalyptastyrady jáne ata-babalar erliginiń umyt qalýyna jol bermeıdi.
Aıta ketelik Prezıdent Іs basqarmasyna qarasty uıymdar ardagerler men tyl eńbekkerlerin Jeńis kúnimen quttyqtaǵan edi.
