Elordalyq sportshylar para paýerlıftıngten el chempıonatynda birneshe medal jeńip aldy
ASTANA. KAZINFORM – Astanadaǵy Paralımpıadalyq jattyqtyrý ortalyǵynda tirek-qımyl apparaty zaqymdanǵan sportshylar arasynda para paýerlıftıngten Qazaqstan chempıonaty óz máresine jetti. El birinshiliginde elordalyq sportshylar 3 altyn, 2 kúmis jáne 1 qola medal jeńip alyp, jalpykomandalyq esepte 4-orynǵa turaqtady, dep habarlaıdy Astana ákimdiginiń resmı saıty.
Elordalyq sportshylardyń nátıjeleri:
Vazır Nadyrov – 59 kelige deıingi salmaqta jeke esepte 133 kg kóterip, 1-oryn aldy; úsh tásil qosyndysy boıynsha 380 kg nátıjesimen de 1-oryn ıelendi.
Qýanysh Rahatuly – 54 kelige deıingi salmaqta jeke esepte 122 kg kóterip, 1-orynǵa shyqty; úsh tásil qosyndysy boıynsha 232 kg nátıjesimen 3-oryn aldy.
Qanat Baılın – 107 kelige deıingi salmaqta jeke esepte 154 kg kóterip, 2-oryndy ıelendi; úsh tásil qosyndysy boıynsha 449 kg nátıjesimen de 2-oryndy aldy.
– Týrnırge elimizdiń 17 óńirinen 130-ǵa jýyq sportshy 20 salmaq dárejesi boıynsha synǵa tústi. Jarys qorytyndysy boıynsha úzdik óner kórsetken sportshylar ulttyq qurama sapyna irikteledi. Oǵan qosa, bul báseke sáýir aıynda Bangkok qalasynda (Taıland) ótetin Azııa chempıonatyna irikteý kezeńi bolyp sanalady. Aldaǵy ýaqytta Qazaqstan ulttyq quramasy 6-11 naýryz aralyǵynda Tbılısıde (Grýzııa) ótetin halyqaralyq týrnırge attanady. Sportshylarymyz atalǵan básekede joǵary nátıjege qol jetkizedi degen úmittemiz, - dedi Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń para paýerlıftıngten komanda basshysy Ulan Anýar.
Jalpykomandalyq esepte birinshi oryndy Qyzylorda oblysy ıelense, ekinshi oryn Jetisý oblysyna, úshinshi oryn Qostanaı oblysyna buıyrdy.
Eske salsaq, budan buryn dzıýdodan el quramasy Tashkenttegi Grand Slam týrnırin júldesiz aıaqtaǵanyn habarlaǵan edik.