Elordalyq sportshylar Frantsııada kórkem júzýden ótken Álem Kýbogynda altyn medal aldy
ASTANA. KAZINFORM – Frantsııa astanasy Parıjde kórkem júzýden jyldyń alǵashqy Álem Kýbogy óz máresine jetti. Bul týraly elorda ákimdiginiń resmı saıty jazdy.

Bul bedeldi jarysta Astana qalasynyń sportshylary jasóspirimder arasyndaǵy komandalyq erkin baǵdarlama boıynsha joǵary nátıje kórsetip, altyn medal ıelendi. Komanda sapynda Irına Govorýhına, Irada Islamova, ıAsmına Islamova, Maqpal Kalmýrzaeva, Albına Ómirserikqyzy men Aldııar Ramazanov óner kórsetti.

Osyǵan deıin de Astana sportshylary jarysta joǵary nátıje kórsetip, jekelegen baǵdarlamalarda júldeli oryndarǵa ıe boldy. Artýr Maıdanov pen Valerııa Stolbýnova juby, sondaı-aq Edýard Kım tamasha óner kórsetip, kúmis medal enshiledi.

Baıraqty básekege álemniń 22 elinen 167 sportshy qatysty.
Buǵan deıin habarlanǵandaı, astanalyq jas hokkeıshiler Kanadanyń Kvebek qalasyndaǵy bedeldi týrnırde kúmis júlde qanjyǵalaǵan bolatyn.