Astanalyq sportshylar gımnastıkadan álem kýbogynda qola júldege ıe boldy
ASTANA. KAZINFORM – Elordalyq №1 balalar men jasóspirimderdiń mamandandyrylǵan olımpıadalyq rezerv sport mektebiniń arýlary álem kýbogynyń ekinshi kezeńinde 39 eldiń úzdikterimen baq synasyp, ózgelerden oq boıy oza shapty, dep habarlaıdy elorda ákimdiginiń resmı saıty.
Atap aıtar bolsaq, astanalyq «Fýror» komandasy baıraqty básekede lentamen óner kórsetip, qola júldege qol jetkizdi. Komanda quramynda Jasmın Júnisbaeva, Krıstına Chepýlskaıa, Aıda Hakımjanova, Aızere Keńes, Aızere Nurmaǵambetova jáne Mádına Myrzabaı óner kórsetti.
– Bizdiń sportshylar halyqaralyq arenada elimizdiń abyroıyn asqaqtatyp, myqty qarsylastar arasynda joǵary nátıjege qol jetkizdi. Álem kýbogynda úlken jetistikke jetý úshin bar kúshimizdi saldyq. Jaqsy daıyndaldyq. Osy oraıda komandamyzdy shyn júrekten quttyqtaǵym keledi. Jańa belesterge jete berińizder, - dedi №1 balalar men jasóspirimderdiń mamandandyrylǵan olımpıadalyq rezerv sport mektebiniń kórkem gımnastıka bóliminiń aǵa jattyqtyrýshysy Merýert Balgınbaeva.
Jarys qorytyndysy boıynsha júldeli 1-oryndy Qytaı quramasy, 2-oryndy Izraıl aldy. Al Qazaqstan úzdik úshtiktiń qataryna endi.
Eske sala keteıik, buǵan deıin Mılad Karımıdiń álem kýbogy kezeńinde taǵy bir altyn alǵanyn habarlaǵan edik.