Elordalyq sportshy Álem kýbogynda qola medal jeńip aldy
ASTANA. KAZINFORM — Kórkem gımnastıkadan Ázerbaıjan astanasy Baký qalasynda ótken álem kýbogynyń 3-kezeńinde el namysyn qorǵaǵan elordalyq Aqmaral Erekesheva júldegerler qatarynan kórindi. bul týraly Astana qalasynyń ákimdigi málim etti.
Jasóspirimder arasyndaǵy álem chempıony Aqmaral alǵash ret eresekter deńgeıindegi iri halyqaralyq jarysqa qatysyp, taspa jattyǵýynda 27.000 upaı jınap, qola medal ıelendi.
Jarys qorytyndysy boıynsha:
1-oryn: Darıa Varfolomeeva (Germanııa, Parıj Olımpıadasynyń chempıony) – 28.800 upaı;
2-oryn: Sofııa Raffaelı (Italııa, Parıj Olımpıadasynyń qola júldegeri) – 28.500 upaı;
3-oryn: Aqmaral Erekesheva (Qazaqstan) – 27.000 upaı.
Aqmaral Erekesheva jarys barysynda Azııa oıyndarynyń chempıony Tahmına Ikromova (Ózbekstan), álem chempıonatynyń júldegeri Taısııa Onorııchýk (Ýkraına) jáne Bolgarııa ókili Stılııana Nıkolovany artta qaldyrdy.
Sondaı-aq jerlesimiz kópsaıys nátıjesinde úzdik ondyqqa endi.
Buǵan deıin kórkem gımnastıkadan Qazaqstan quramasy Tashkenttegi Álem kýbogynda kúmis medal alǵan bolatyn.
