Elordalyq polıtsııa dronnyń kómegimen kóshelerdi lastap júrgenderdi anyqtap jatyr
ASTANA. KAZINFORM – Astanada «Taza Qazaqstan» respýblıkalyq ekologııalyq aktsııasy aıasynda abattandyrý erejeleriniń buzylýyna jol bermeý boıynsha júıeli jumys jalǵasyp jatyr. Bul baǵytta polıtsııa keshendi sharalar qabyldap, zamanaýı tsıfrlyq tehnologııalardy da qoldanýda, dep habarlaıdy qalalyq polıtsııa departamenti.
Qalanyń ekologııalyq jaǵdaıyn jaqsartý jáne syrtqy kelbetin saqtaý maqsatynda tártip saqshylary qoǵamdyq aýmaqtardy lastaý faktilerin anyqtaý jáne abattandyrý erejeleriniń saqtalýyn baqylaý boıynsha keshendi sharalar júrgizip jatyr.
Bul rette quqyq buzýshylyqtardy anyqtaý úshin Jedel basqarý ortalyǵynyń kameralary jáne ushqyshsyz ushý apparattary (drondar) belsendi paıdalanylady. Olar zańsyz qoqys oryndaryn, onyń ishinde qala shetinde ornalasqan aýmaqtarda jedel anyqtaýǵa múmkindik beredi.
Turaqty túrde reıdter men patrýldeý jumysy júrgiziledi. Eń jıi buzýshylyqtar qurylys nysandary mańynda tirkeledi, munda qurylys jáne turmystyq qaldyqtardyń ýaqytyly shyǵarylmaı jınalyp qalýy baıqalady.
Máselen, elordanyń bir aýdanynda, Kóktal kóshesi boıynda turǵyn jáne óndiristik nysandar mańynda osyndaı birqatar problema anyqtalǵan.
Árbir derek boıynsha tıisti sharalar qabyldanǵan.
Jyl basynan beri qalada abattandyrý erejelerin buzýdyń shamamen 19 myń faktisi tirkelgen. Sonymen qatar, qaldyqtardy belgilenbegen oryndarǵa tastaý derekteri boıynsha Astana qalasy Ekologııa departamentine shamamen 400 materıal joldanyp, tıisti shara qabyldaý úshin jiberilgen.
Polıtsııa turǵyndarmen jáne ekologııalyq belsendilermen birlesip, profılaktıkalyq jumystardy da kúsheıtip otyr.
Bul ekologııaǵa jaýapkershilikpen qaraý mádenıetin qalyptastyrýǵa baǵyttalǵan.
Quqyq qorǵaý organdary abattandyrý erejelerin saqtaý árbir turǵynnyń mindeti ekenin eske salady. Belgilengen normalardy buzý ákimshilik jaýapkershilikke ákep soǵady.
Aıta keteıik, Qazaqstandaǵy sý aıdynyna drondar arqyly monıtorıng jasalady.
