Elordalyq oqýshylar Ulybrıtanııadaǵy halyqaralyq chempıonattyń jeńimpazy atandy
ASTANA. KAZINFORM — Ulybrıtanııanyń Herogeıt qalasynda Institution of Engineering and Technology uıymdastyrǵan bedeldi UK First Lego League Championship halyqaralyq robototehnıka chempıonaty ótti, dep habarlaıdy Oqý-aǵartý mınıstrliginiń baspasóz qyzmeti.
Qazaqstan qurama komandasyndaǵy Astana qalasynyń oqýshylary jarysta úzdik nátıje kórsetip, birden eki basty marapatty jeńip aldy. Oqýshylar robot-oıyn boıynsha 1-oryn jáne jarystyń úzdik komandasy atandy.
Chempıonatqa Ulybrıtanııa, Brazılııa, Frantsııa, Germanııa jáne Slovakııa syndy elderden 68 komanda qatysty. Komanda bul chempıonatqa Astanada ótken Central Asia First Championship týrnırindegi sátti óner kórsetýdiń nátıjesinde joldama alǵan.
— Robot-oıynnan bólek, qatysýshylar «artifacts.kz» atty Qazaqstandaǵy arheologııalyq artefaktilerdiń onlaın-bazasyn usyndy. Joba aıasynda oqýshylar ıdeıadan bastap zertteý, tehnıkalyq ázirleý jáne profıldi ınstıtýttarmen baılanysqa deıingi tolyq protsesti kórsetti. Joba tehnologııalyq deńgeıimen ǵana emes, ulttyq mádenı murany saqtaýǵa qosqan úlesimen de joǵary baǵalandy, — delingen mınıstrlik taratqan aqparatta.
Osydan buryn almatylyq oqýshy BUU shtab-páterinde álemniń úzdik 3 jas ınnovatorynyń qataryna engenin jazǵanbyz.
